Mannurot: Dagiti Siit iti Dalan ni PNoy

Kolum ni Danny Antalan
(Maudi a paset)

Department of Transportation and Communication Secretary Jun Abaya ti nagbalin a sikat gapu met iti kontrobersia a kontrata para iti Metro Railway Transit (MRT) station 3. Adda pay dagiti awag kenkuana nga aglusulosen idi gapu met laengen iti isyu. Nadegdegan pay daytoy kadagiti nagsasaruno a disgrasia ti MRT iti kallabes a bulan.

Department of Social Welfare and Development Secretary Dinky Solaiman ti mabalin a nakasiksikat gapu iti programa a 4Pā€™s or Pantawid Pamilyang Pilipino Program wenno programa a para kadagiti nasurok 4.1 a milion a marigrigat a maik-ikkan ti programa. Ngem piman ta kagiddanna met daytoy ti nagad-adu a problema mainaig iti daytoy a program. Gapu iti kadakkel ti pondo, adda dagiti mangdudua no natulnog met ti panakaipaayna daytoy kadagiti pudpudno a marigrigat. Adda dagiti kayatna ma-audit daytoy tapno makita no nadalus ti panakaitedna. Malaksid iti daytoy, adda pay dagiti kayatda nga aglusulos isuna gapu iti panakadadael a food packs a saanen a naited kadagiti biktima ti bagyo Yolanda.

Vice President Jejomar Binay. Isu ngatan ti kalatakan iti kontrobersia itay napalabas a bulan. Agpayso nga isuna ket agdama a bise-presidente ngem isuna ket maysa latta a gabinete ni Presidente Aquino gapu ta isuna ti agdama a Chairman ti Housing and Urban Development Coordinating Council. Nupay kasta, adda ti kontrobersia a masapul a lawlawaganna kadagiti umili a kas koma ti nangina a pagparkingan idiay Makati, nalawa a sanikuana idiay Batangas a naawagan pay ketdin a Binay Farm ken dagiti condominium iti Makati City. Malaksid iti dayta, ada pay dagiti kontrobersiana a nakairamanan ti naganna.

Dagitoy ket sumagmamano laeng kadagiti gabinetena a makasinit ti kontrobersiana. Kinapudnona, dagiti nadakamat ket dagiti tartaraudi laengen iti administrasionna. Adda isuna iti tartaraudi ti panagtakemna ket bumegbeggang met ti nagan ti panakairaman dagiti boysna. Dagiti nagan nga umun-una ket kasla nalipatanen.

Ngem adda ti paborito ti presidente. Kinayatna nga umun-una a maimbestigaran ti kaso kenni Sekretario Ona ngem ti paboritona ken nabayag a nakadkadduana a ni PNP Chief Purisima. Kasta met a di unay naglatak ti kontrobersia ni Franklin Drilon a presidente ti senado. Di met mailibak nga adayo nga as-asideg da Drilon ken Purisima ngem ni Ona. Wen, no kinaasideg iti pamilia ken pulitika, ad-adu ti bonding dagitoy dua ngem kadagiti dadduma.

Karbenganna ti mangikalintegan kadagiti kayatna nga ikalintegan ngem sapay koma ta saan met nga isu ti pagbaliwan ti legacyna iti imatang dagiti tattao nga idadauluanna. Sabagay, uray iti uneg ti pamilia ket adda latta met ti makunkuna a favouritism.

Ngem napinpintas koma nga aramiden ni PNoy ti panangdalusna iti masakupanna ta isu daytoy ti ad-adda a nakabigbiganna. Isu daytoy ti legacyna. Ta nupay nadalus ti naganna ngem narugit met ti nagan ti aglawlawna, isu latta a mairaman latta ti naganna iti impression a madi.

Adda pay nakurang dua tawen a panagtalinaedna iti Malacanang ngem no ar-arigen, kasla agkurang pay laeng ti naaramidanna tapno aglatak koma ti naganna. Ta madi met a ti pakabigbiganna laeng ket ti panangipabaludna kadagiti kabusorna iti pulitika ken dagiti potensial a mangabak iti sumaruno nga agtugaw iti Malakanyang tapno laeng mawayaan ti dalan dagiti dungdunguen a kapartidona.#