Mannurot: Naragsak a Paskua

Kolum ni Danny Antalan
(Umuna a Paset)

Karagsakanen ti Paskua iti Pilipinas.

Ta ania koma pay ti karagsakan a pagtengtayo no di ti makadenna ti pamilia iti lamisaan tapno agsasango iti noche buena, ti makaddua ti kaarruba iti panagkanta iti kompaniar ti gitara wenno iti videoke? Agawidtayo iti probinsia tapno makadenna ti ay-ayaten a da apong a lakay ken apong baket. Ti tumulong nga agluto ti patupat, imbagkal, puto ken dadduma pay sagana. Ti agkukuyog a mapan makimisa de gallo ken agdadanggay iti kararag.

No adda man ti maysa kadagiti rumbeng a pagyamanantayo kadagiti Kastila a nangsakup iti Pilipinas iti nasurok tallo gasut a tawen ket ti panangipasagepsepda kadatayo ti tradision ken kultura ti Paskua. Mabalintayo ngata met kunaen, imbag laengen ta sinakopdatayo dagitoy a ganggannaet a Puraw ket pinagbalinda nga 80 a porsiento ti Pilipino a Katoliko ta naaddaantayo iti rason iti nangayed ken naragsak a Paskua.

Nasurok 100 a milion a Pilipino; nasurok 7,000 a purpuro; maysa a pagilian; maysa a selebrasion ti Paskua.

Agpapan kadagitoy a panawen, di pay pulos naglumen ti raniag ti Paskua iti parol ni Pilipino. Awan ti pagtaengan nga awan bitinna a parol. Awan ti pagtaengan a dina kasango ti pamiliana. Amin a tao ket adda ayat iti pusona. Amin a tao ti agyamyaman.

TI PASKUA IDI

Naragragsak idi ti Paskua, kuna ni Bianang. Dagiti panawen ti Paskua a dagiti mapan makipaspaskua ket dagiti babbaket ken lallakay a saan ket dagiti ubbing ita a panawen. Idi makipaspaskuada iti tengnga ti rabii a nagiggem iti ukulele, gitara ken biolin nga agkantada kadagiti kansion a nagbalin nga immortal:

Daytoy a balay, ti naturongmi
Balayda/yo nanang nga am-ammomi
Ditoy ngatan ti pakagulpeanmi
Ti nawadwad nga aginaldomi

Ala, nanang, mangbusboskayo
Uray no sensilio no sangasudo
Uray no maymaysa no papel de banko.

“Piek, piek, piek” bassit pay laeng
“Kutak, kutak, kutak” mabalbalinen
Inka kad’ iruaren
‘Tay aginaldomi a manoken…”

Mangrugi ti grupo no sumipngeten. Nakakawes iti napuskol ta nalamiis ti agpatnag. Amin a pagtaengan ket batoganda, narigat man wenno nabaknang ti akinbalay. Kaimas ti maturog iti tengnga ti rabii, mangegmonto laengen ti ayugna a kasla tagtagainep a mangririing kenka. Bumangonka uray awan ti kuarta. Adda la ketdi ti bagas, nateng wenno prutas a maipapaskua kadakuada. No awan latta, inka mangtiliw iti pamusian dita sanga ti mangga.

Inton agbannawag, agsardengda metten. Pagbibingayandanton ti pirak a naited kadakuada, agraman dagiti bagas, saba, manok ken uray ti daing.

(Adda tuloyna)