Mannurot: Padasem ti Internet

Kolum ni Danny Antalan

(Umuna iti dua a paset)

Maysa kadagiti kangrunaan a problema ti Pilipinas ti kinakisang ti trabaho. Kanayon a nangato ti unemployment rate ti pagilian. Itay napalabas a tawen, agarup 7.3 percent wenno nasurok 12 milion a tattao ti awan trabahona. Daytoy ti kangatuan iti Southeast Asian nations.
Tinawen nga adu ti agraduar kadagiti kurso nga ididiaya ti kolehio. Bassit laeng a bilang kadagitoy a naggraduar ti mapagasatan a makabirok iti trabaho.

No apay met a narigat dagiti kagradgraduar ti agbirok iti trabaho ket gapuanan dagitoy sumaganad: 1. Awan ti bakante iti maysa a negosio establisimiento, 2. Saan a mayanatup ti kurso ti agsapsapul ti trabaho, 3. Nababa ken saan a makaay-ayo a grado idi agbasbasa, 3. Kasapulan ti backer iti panagsapul ti trabaho, 4. Awan ti koneksion, 5. Managbabain ti agsapsapul iti trabaho, 6. Nangato nga standard ti negosio establisimiento, 7. Agkurang ti kuarta a pangsupusop iti kasapulan iti panagbirok ti trabaho, ken dadduma pay a rason no apay a dida makabirok iti trabaho.

Iti biang ti gobierno, adda metten dagiti pamuspusanda tapno masulnitan dagitoy nga unemployment kas koma ti Government Internment Program (GIP) ken ti Special Program for the Employment of Students (SPES).

Ngem kaskasdi, adda latta dagiti di makabirok ti trabahoda. Adu latta dagiti kunkunada a “gingineer”, CPA wenno counting post around, ken dadduma pay nga awag kadakuada.

Ngem no ar-arigen, saan koma a problema ti pagtrabahuan no la ketdi aramaten ti maysa nga agbirbirok ti kinasidapna. Saan laeng iti panag-apply iti trabaho a maaddaanka iti sueldo. Agsipud ta no dika makabirok iti ruar, mabalin nga adda pagsuelduam iti uneg. Pagsayaatanna, bagim pay amin nga oras ken panawen nga agtegged iti kuarta.

Ket ditoy a makatulong ti internet. Pagsayaatanna, doliar ti bayad kenka ti kaadduan.

Nagad-adu ti potensial a mabalin nga aramiden iti internet. Kinapudno, adu ti pumanpanaw iti trabahoda gapu ta dakdakkel ti maganansiada iti panagtrabaho babaen iti tulong ti internet. No agsuelsueldoka laeng iti opisina wenno iti pagnegosiuan, limitado wenno addan naikeddeng a sueldo nga awatem. Ngem no magamaymo ti trabaho iti internet, amang a dakdakkel gayam ti masueldom.

(Adda tuloyna)