Footer

Manong polis, inyussuat ti hepe ti PNP iti Region I

SAN FERNANDO, La Union – Kas paset ti programa ti Philippine National Police a mangpasubli ti napintas nga imahe ti polis, indauluan ni PNP Chief Police Director General Avelino Razon Jr. ti pannakaiyussuat ti 'Manong Pulis' ditoy rehion uno  itay Hulyo 21.

Kinuna ni Razon nga ipangrunana ti pannakaisubli ti napintas nga imahe da Mamang Pulis ken Aleng Pulis kas iti panagbalinda a propesional iti trabahoda, disente ken pagraraeman ti komunidad.

Segun ken ni Razon, inyussuatna ti 'Manong Pulis' tapno nalaklaka ken mas komportable nga asitgan dagiti umili dagiti otoridad, nangruna dagiti addaan ti problema ken tumulong iti panangparmek dagiti nadumaduma a krimen.

Innayon ti PNP chief a maaramid laeng daytoy iti pannakapukawen a maminpinsan dagiti kotong cops a mangmanmantsa iti imahe ti kapolisan.

Nagturong  ni Razon ditoy probinsia partikular ti Police Regional Office-1 tapno iyussuatna ti maysa kadagiti programana a 'Manong Pulis' ken nagserbi a guest of honor and speaker iti naangay a Regional Peace and Order Council meeting a naangay iti daytoy a siudad iti daytoy nga aldaw.

Kinuna ni Razon a silulukat ti ima ti PNP a makipagpartner iti RPOC ken sisasagana a mangipaay iti police action ken intervention no kasapulan kas paset ti panangipatungpal iti linteg ken panangprotehir kadagiti umili.

Dinawat pay ni Razon ti kooperasion ti amin a sector idinto nga inggunamgunamna  a maysa a multisectoral effort ti pannakatagiben ti peace and order no sadino a kasapulan ti kooperasion para iti agtultuloy a pannakaipasdek ti napigsa a linia ti depensa.

“Masapul a natalged ti rikna dagiti umili ken awan ti mariknada a buteng bayat ti panagnegosioda ken panagsantak ti turismo iti amin a paset ti pagilian. Dayta ti gapuna no apay nga ibilbilinko ti pannakaideploy ti ad-adu a polis kadagiti crime-prone areas tapno within reach a kanayon dagiti polistayo,” kinuna pay ni Razon.

Inyunay-unayna a dagitoy dagiti karit a kasapulan a masustener ken  ibirokan iti baro nga avenues ti kooperasion tapno maisubli ti napintas a panagkita ti komunidad iti  PNP.

Kabayatanna, pito a police officers manipud Ilocos Norte, Ilocos Sur, La Union ken Pangasinan ti naipaayan iti Medalya ng Kasanayan ken Medalya ng Kagalingan gapu iti dakkel a kontribusionda iti panangpapigsa iti organisasion ken panangparmek iti krimen ditoy rehion. (Karaman ti report ni Mancielito S. Tacadena/NBN 4 Vigan)