Footer

Mapa dagiti il-ili, mapabaro

VIGAN CITY – Agpaspasiar dagiti personnel ti National Statistics Office (NSO) para iti updating dagiti mapa ti probinsia.

Naammuan manipud ken ni Provincial Statistics Officer Urbana  A. Romano a madama ti updating dagiti mapa kadagiti nadumaduma nga ili iti probinsia nga adda nagbaliwanna wenno nagdur-asanna, kas koma iti kabarbaro a landmark, sabali a dalan ken dadduma pay a nagbaliwanda.

Kinuna ni Romano a mas aktual itan ti mapa dagiti il-ili ti probinsia agsipud ta nangalada kadagiti personnel a naglikus kadagiti amin a barangay babaen ti Global Positional System (GPS).

Mainaig dagiti pagbeddengan dagiti barangay, kinuna ni Romano a mismo a nagpakuyog dagiti personnel ti NSO kadagiti barangay kagawad tapno itudoda dagiti boundaries iti lugarda.

Innayonna a no saan nga agsurot dagiti boundaries dagiti barangay, ayabanda dagiti barangay officials tapno mapinal no ania nga agpayso ti pagbeddenganda.

Kinuna pay ni Romano a madama ti pannakai-match ti mapa a naalada babaen ti GPS iti Google tapno masimpa ti mapa dagiti il-ili.#