Footer

Mapno Met Ti Salop

Sarita ni Rilo A. Bedo

(Maudi a paset)

 

“Oy, kaska met la napukawanen iti minilion dita,” insipat ni Rita iti abagak idi diak met la agkir-in iti nagtakderak. “Dika ket agragsak ta bukodtan dagiti kanito!”

“Sika laeng ti agragsak no kayatmo!” imbugkawko idi maalawko ti riknak.

Wen, lipliputak ni baket. Ngem kas nakunakon, awan panggepko a mangsukat kenkuana. Ay-ayatek unay. Narigaten ti agsapul iti kas kenkuana. Agbagtitak la ketdi no mapukawko.

Nangamparaak iti traysikel. “Dinakon riribuken!” kinunak ken ni Rita.

Nagpaitulodak iti balay.

Madama nga agsasaibbek ni baket a nadanonak iti kuartomi. Agim-impake kadagiti lupotna.

“Pakawanennak koma, ‘Ma,” rinakusko. Ngem sinikilnak.

“Dinak iggaman… kagurguraka!” insaibbekna.

“Diakton ul-uliten, ‘Ma… pakawanennak koma, a.”

“Namin-anon a linokonak?” sinangonak. “Adun a daras! Diak laeng nagun-uni ta awan pammaneknekko,” agar-arubos dagiti luana.

“Aklonek, nagbasolak, ‘Ma. ‘Kannak koma pay iti sabali a gundaay. Ikarik, diakton uliten…”

“Nagsaem a panunoten,” intuloyna ti nagempake, “nga iti labes ti nalaus a panagayatko kenka, lipliputannak gayam…”

“Pakawanennak koma…”

“’Panmo lattan ugmokan ti babaim! Baybay-annakon!”

“Saan, a, ‘Ma. Sika ti ay-ayatek… sika ti asawak…”

“Asawa?” kinusilapannak. “Kaano pay nga imbilangnak nga asawa, ha, Ruben?”

Naikulengak. Awan maarikapko nga isungbat.

“Agsinata laengen!” imbikagna. “Nasaysayaaten ngem iti loklokuennak!”

Sina? Pordios! “Saan, a, ‘Ma… Urnosenta koma ti amin…”

“Di kad’ isu ti kayatmo tapno maipennekmo ti panawenmo iti babaim? Ammok, a, agkaskastaka ta dika pay maipaayan iti anak..”

“Saan, ’Ma.  Pangngaasim, dinak panawan…” diakon naterred dagiti nagarubos a luak.

Naukas ti irteng iti rupana.

“Pakawanennak…”

Immanges iti nauneg. “Sige, tapno dimo met kunaen, ikkanka iti maudi a gundaway. Ulitek, maudi a gundaway…”

Naarakupko ni baket iti ragsakko. Ngem inwadagnak latta.

“’Ka pay agdigos ket no maakaranak iti gagatel!” kinunana.

Iti pannakadamag ni tatang iti napasamak, saan a nagpamayang nga immallatiw. Naimbag ta nakalikuden ni baket a nangitulod iti dinaitna nga uniporme ti maestra iti asideg ti haywey.

“Dayta ti hambol?” insidirna a dagus idi madanonnak iti sango ti balay a mangtartarimaan iti bisikletak.

“Tagtagariyo kad’ lattan, ‘Tang,” kinunak. “Nakababain kadagiti kaarruba…”

“Nanggatangam iti bainmo?” insumrana a dagus. “Agyamanka ta dinaka a pinanawan!”

“Nagbabawyak ti aminen, ‘Tang…”

“Rumbeng laeng, loko. Mangilaklak-amka!”

Napaellek ti unegko. Mangilaklak-am? Koma no diak ammo nga adda met idi bullilisingna idi kadendennada ken nanang.

“Idiamon dayta nga aramidmo, loko!”

“MAMATIKAN, ‘Ma?” inlailok ken ni baket kadayta a rabii. Makabulanen sipud naduktalannak.

“Iti ania?”

“A sinardengakon ti babaik, a…”

“Diak ammo…”

“Apay ngay a kasta ti saom, ‘Ma?”

“Kunada man, ‘Pa, a no nailasagen ti bisio, aglalo no naitulangen, narigaten a maikkat…”

“Diak pay met naitulang, a, ‘Ma.”

“Sapay la koma.”

Agsasaruno ti panangkantiaw kaniak ni Pari Jojo no kasta nga agranakami iti terminal. Diak ngaminen mapmapan no agawis a rummuarkami iti rabii. Andresak kano!

Ti dina ammo, addan kasukat ni Rita. Diak imbagbaga daytoy kenkuana ta dakkel ti atapko nga isu ti nagipulong ken ni baket. Awan la ngamin ti ebidensiak. Agpapan kadagitoy, di met pay imbaga ni baket ti nakaammuanna ti kaaddak iti babaik kadaydi a kanito. Ngem no mapaneknekak nga isu, ay, ibukingko met ken ni baketna!

Naklaatak kadayta a panangmalemmi ken ni baket.

“Ammom kadi, ‘Pa, a mapno met ti salop?” pagammuan ta kinunana.

“Aniat’ kayatmo a sawen?” kinarayamannak ti danag.

“Ammok nga ammom…”

KINASARITAK a naimbag ni Malou, ti insukatko ken ni Rita. Impalawagko kenkuana a kissayanmi pay laeng ti oras a panagkitkitami ta nakadlaw sa ni baket. Naawatanna met.

Ngem anian a pannakakellaatko idi makasangpetak iti balay. Maysa a surat ti nadanonak iti rabaw ti panganan. Surat ni baket!

Ita a basbasaem daytoy, addaakon iti dalan nga agpa-Kalinga. Malagipmo daydi kunak a mapno met ti salop? Napasamaken!

Ala, sapay koma ta naragsakka iti sidong ni Malou—ti babaim!

Kasano a naammuanna ti amin?

P.S. Dinakon suroten pay. Kalingaak, laglagipem…

Nakunesko ti surat. Iti panagtamdagko iti tawa, naipasabat kaniak dagiti nanglaylayen a mula ni baket.#