Mapukpukaw a balasitang, di pay nasarakan

BANTAY, Ilocos Sur – Saan pay a nasarakan ti balasitang a mapukpukaw manipud pay idi Disiembre itay napan a tawen.

Kinuna ni Chief of Police ti Sta. Maria, Police Senior Inspector Eric Fernandez iti media itay lawasna a mapukpukaw pay laeng ti nasao a balasitang iti baet a nasuroken a tallo a bulan sipud nagpukaw idi Disiembre 5 itay napan a tawen.

Sakbayna, imbilin ni PNP provincial director Police Senior Supt. Virgilio Fabros ken ni Fernandez ti panangi-yussuatna iti naing-inget nga inbestigasion ken panangidatagna iti update report mainaig iti mapukpukaw a balasitang a mapapati a biktima iti panagkidnap.

Sabali pay a direktiba  ti provincial director ti naited kadagiti amin a hepe iti polis iti probinsia iti panangipasdekda kadagiti checkpoint iti nag-beddengan ti Ilocos Sur ken Ilocos Norte, La Union ken Abra para iti pannakasiput iti maysa a puraw a van a mapapati a lugan dagiti agdukdukot iti ubbing nga agsawsawar iti probinsia.

Nagwaras itay nabiit iti probinsia ti maysa a text message a mapapati a naggapu iti maysa a bise mayor iti Talisay, Batangas a mangi-balballaag kadagiti nakaipa-tulodanna iti kaadda iti maysa a puraw a van a mapapati a nagluganan ti maysa grupo dagiti agdukdukot kadagiti ubbing sada alaen dagiti nagunegda.

Iti pammilin ni Fabros, imbilinna ti panangidatag ti hepe ti polis ti Sta. Maria iti report mainaig iti panagpukaw ti maysa a Grade VI pupil nga agtawen iti 12, agbasbasa iti Silag Elementary School a naipadamag a mapukpukaw pay la manipud iti umuna a lawas ti Disiembre 2007.

Naudi a nakita ti balasitang idi napan nagbasa iti malem ti Disiembre 5 a nakasakay iti bisikletana.

Nasarakan ti bisikleta iti lugar a narasay ti kabalbalayan ngem awan ti balasitang.

Agingga iti agdama, awan pay ti pakadamagan no sadino ti yan ti nasao a balasitang.

Ngem nadakamat ti guardian ti ubing, ni Florentina Molina, nga adda agindeg iti Barangay Cabaroan, kaparanget ti Barangay Silag, a mapapati a nagsaludsodan dagiti lallaki a nakalugan iti van iti direksion a turongenda.

Segun pay ken ni Molina, naibaga pay ti taga-Cabaroan a napardas a limmabas a nagpalaud ti nasao a van iti agarup ala una iti malem a panagpukaw ti balasitang.

Sabali pay a balasitang nga agbasbasa iti Ag-agrao High School ti mapapati a pinanggep a kidnapen ti uppat a lallaki ken maysa a babai iti agarup alas 4 ti malem iti Disiembre 10 bayat ti panaggawidna manipud iti pagadalan.

Saan nga intuloy ti grupo ti panggepda gapu iti panaglaaw ti maysa a lalaki iti asideg.

Iti agwarwaras a text message, mapapati nga iti siudad ti Baguio ti naudi a nakakitaan iti lugan ti kidnap gang.#