Footer

Mapukpukaw a motorsiklo, naisubli.

STO. DOMINGO, Ilocos Sur – Sabali gayam ti nasakayanna imbes a ti motorsiklona, daytoy ti inrason ti maysa a helper idi insublina ti naireport a mapukpukaw lugan iti police station ditoy nga ili idi bigat ti Hulio 26.

Idi malem ti Hulio 25, inreport ni Francisco Tesorio y Amistad, 74, negosiante, ken residente iti Barangay Cabaritan, ditoy nga ili, a natakaw ti nalabaga a Honda Wave 100 a motorsiklona.

Kabigatanna, idi agarup 8:30 ti bigat, boluntario nga impan ni Julius Tabieros Infante, 23, helper iti ACV Roofing, ti nasao a lugan a kunana a biddut a sinakayanna imbes a ti motorsiklo a kukua ti employerna a naiparking iti asideg.

Saan a nailanad iti blotter no kasano a napagandar ni Tabieros ti motorsiklo idinto a sabali met ti tulbekna.

Nupay kasta, nagpirma ni Tesorio iti apidabit a saanen nga interesado nga agipila iti kaso maikontra ken ni Tabieros.