Mapukpukaw nga ATM card ti benepisario ti 4Ps, ramut ti pammagsol

SANTA, Ilocos Sur – Ti mapukpukaw nga ATM card ti maysa a benepisario ti 4Ps ti mitsa ti di panagkinnaawatan ti agikit a nagtungpal ti panangbagsol ti nabakbaket iti kaanakanna idi aldaw ti Disiembre 19.

Binagsol ni Emelyn CariƱo y Lufranco, 35, naasawaan, ti kaanakanna a nainaganan Judy Ann CariƱo y Nagayo, agpada nga agnaed iti Barangay Nagpanaoan ditoy nga ili, gapu iti panagsusikda a nagramut iti mapapati a panangiruar ni Judy Ann ti kuartana ni Merlina CariƱo kas benepisario iti Pantawid Pamilyang Pilipino Program (4Ps).

Iti report manipud iti police station ditoy, nagsubang da Emelyn ken ni Judy Ann idi naduktalan ti immuna a mapukpukaw ti 4Ps ATM card ni Merlina a mother in law ni Emelyn ken lola ni Judy Ann.

Pinabasol ni Emelyn ni Judy Ann a nangiruar iti P1,600.00 a linaon ti ATM card ni Merlina kas pensionna a benepisario iti 4Ps.

Mapapati a nangpidut ni JudyAnn iti bato sana dinarup ti ikitna, ket nangala met ni Emelyn iti kitchen knife sana binagsol ti biktima a nagsagrapan daytoy iti sugat iti babaen ti makannigid a kilikilina.

Naitaray ni Judy Ann iti Gabriela Silang General Hospital, Tamag, Vigan City para iti pannakaagas ti sugatna idinto nga inaresto dagiti barangay officials ni Emelyn sada impaima kadagiti nagresponde a polis.

Maysa a programa ti nasional a gobierno ti 4Ps para kadagiti marigrigat a pamilia iti pagilian a mangpasayaat ti panagbiagda pakaseknan iti salun-at, nutrision ken edukasion nangruna dagiti annakda nga agtawen manipud maysa agingga iti 14.

Maited iti benepisario iti 4Ps nga addaan iti tallo a kualipikado nga ubbing iti subsidy a P1,400.00 kada bulan wenno P15,000 kada tawen para iti busbosenda iti salun-at ken nutrision ken para iti edukasion dagiti annakda.

Ngem adu dagiti pulong mainaig kadagiti benepisario ti 4Ps, kas iti panangisugal ti benepisario dagiti awatenna a kuarta imbes a maipaay iti pamilia ken annak kas intuding iti programa.#