MAREGMEG TI BALITOK: Ipas ti Natadem a Balikas

PAGSASAO: Nasaem ti ipas ti di umno a balikas.

Narigat no maminsan ti agsao a dimo ammo a panunoten ti isawangmo. Kaska la nangigayang iti pika a makaammo ditan no sadino ti turongen ken pagdissuanna. Pasaksak a kunada. Ngem kaadduanna a dakes ti pagtungpalanna.

Kastoy met laeng ti sao. Nasaem ti ipasna no maigayang a di umno ket no matiruan ti maysa a tao, maparnuay ti sakit ti nakem a mabalin a mangidaleb kenkuana iti limdo.

Adda dagiti tao a no napalladawan wenno nagayangan iti di umno a sao, agbalin daytoy nga ipas iti kaungganda nga agnunog a mangparnuay iti liday kakuada agingga ken patay. Iti sabali a bangir, adda met dagiti tao a nabato iti sao ket nupay naipas ti kinataoda, pagbalinenda ketdi a positibo a pagbatayan wenno pagrangtayanda a manggun-od iti balligi.

Taldiapantayo ti napasamak ken ni Mario, maysa a mintalon a taga-Ilocos Sur.

Nagarem ni Mario ken ni Shaina, anak ti baknang a negosiante. Ngem natangig ti balasang. Awan panangipirpiritna kadagiti napanglaw a kas ken ni Mario.

Kas ninamnama, pinaay ni Shaina ni Mario. Ngem imbes a naalumamay a wagas ti panangpaayna ken ni Mario, pinasagidanna ketdin iti sao a di pay kayat a lamuten ti aso.

“Nagturedka man a naggarem kaniak idinto a kayariganta ti langit ken daga a saan nga agsabat, wenno iti sabut ken pinggan a saan nga aggakkub,” inlais ketdin ni Shaina.

Arig natungpa ni Mario iti dayta nga imbalikas ni Shaina. Nupay kasta, nagteppel. Siaalumamay a nagpakada.

“Rabakem, addaak iti nalukneng a katre, bumabaak ketdin nga agidda iti datar!” impakamakam ni Shaina.

Talaga a nasaktan ni Mario. Ngem saanna a kinagura ni Shaina. Agpayso ti imbagana, nakunana iti nakemna. Saan a mabalin nga agtipon ti lana ken danum.

Ngem imbes nga agpulkok iti suli, imbilang ni Mario dayta a karit iti kinataona. Inkarina iti bagina a dumtengto ti aldaw nga isu a sabut mabalinnanto a kaluban ti maysa a pinggan.

Inggaedna ngarud ti nagtalon. Nagurnong. Idi addan umdas a pagenrolna, intuloyna ti panagbasana. Babaen ti panagsalukagna iti talon ken iti panagin-inutna, naturposna ti BS in Agriculture, Major in Agronomy. Nakastrek kas agrikulturista iti maysa a dakkel nga agrifarm. Nagustuan ti pangulo ti agrifarm ket impatulodna nga agadal iti Taiwan ken Thailand no sadino a nagadal iti kabarbaro a teknolohia iti panagpaadu iti apit a pagay ken mais.

Ngimmato ti puestona ken sueldona. Nagbalin a nalatak a consultant ken resource person kadagiti seminar ken kumperensia mainaig iti agrikultura ditoy man pagiliantayo ken iti ganggannaet a pagilian.

Maysa nga aldaw, inawis ti gobernador ti probinsiana nga agbalin a resource speaker iti agriculture summit para iti pannakaidur-as ti agrikultura iti probinsia ken pannakatulong kadagiti mannalon a dumur-as iti panagbiagda.

Nagkuros ti dalanda ken ni Shaina iti kapitolio. Ni Shaina ti para lista dagiti timmabuno iti summit. Adu ti bimmaketan ni Shaina.

“Kumustaka, Shaina?” ni Mario ti immuna a kimmablaaw.

“K-kastoy, nasayaat met, sir,” mababain nga insungbat ni Shaina.

Iti nabaknang a pangngaldaw nga insagana ti gobierno probinsial para kenkuana, binirok ni Mario ni Shaina. Ngem awanen a makitana.

Naammuanna iti panagdamdamagna a liman ti annak ni Shaina. Addan iti sekundaria ti inauna. Grade V iti elementaria ti kaudian.

Nadamagna pay a sibabalud ti asawa ni Shaina. Natiliw ti asawana iti maysa a pot session a rinaut dagiti polis.

Saan a nangilunod ni Mario uray no nasakit ti pannakapabainna. Inawatna a sipupuso ti kinapudno. Ta ti panangannunot iti kinapudno ti tulbek a mangpekka iti kawar ti pannakaikulbo.

Nagyaman ketdi ni Mario gapu iti inaramid ni Shaina. Pinagbalinna ti pannakapabainna a maysa a karit a mangital-o iti kinatao ken kasasaadna iti biag. Nagun-odna ti balligi gapu ken ni Shaina.

Nasasaem ti ipas ti balikas ngem ti tadem. Ala wen, ngem dina kayat a sawen a no nasugatkan, ultimon ti lubong kenka. Ketdi, no sadino ti nakaitublakam, sadiay met la ti bumangonam.

Ala ngarud, babayo, kailian!