MAREGMEG TI BALITOK: Kari nga intayab ti kali

Pagsasao: An-annuem diay ruot no natayen diay kabalio?
Wen ngarud a. Pangiserbiam nay?
Ibasuramon a, kuna la ketdi dagiti negative thinkers. Di ipanmo iti sirok ti agsabsabong a mangga ta pagsuobmo, kasta met ti kuna dagiti positibo ti panagpampanunotna.
Ngem, saan a negative ken positive thinking ti kayatko a trataren ditoy, kailian. Ti pakasaritaan ti biag a diak ammo no umisemka wenno agmi-suotka. Makaammokan nga agde-sision no ania ti pagtakderam. Ta no siak ti pangdamagan, ibagak la ketdi nga agmisuotak. No diak makateppel, amangan no pumugtitak pay iti suronko.
Pakasaritaan daytoy da pulano ken pulana. Saantan nga inaganan ida tapno mailingedta ti kinataoda. Well, makuna a nasaliwanwan met bassit ti panagbiag da pulano ken pulana. Addaanda iti uppat nga annak.
No adda maipilaw kada pulano ken pulana, isu ti kinanalaingda nga agtung-it, agpusoy dos, agmahjong, ken aghueteng. Mannugalda, kunata man laengen tapno nalawlawag. No apay ketdi, a sal-it iti kasasal-itan, no apay a di maisardeng ti ‘nimal a hueteng iti probinsia. Sa ket, nag-pigsa pay nga agpallot ni pulano.
Gapu iti daytoy a kunamannugalda, dida man la maigatangan iti uray nalaka laeng nga ay-ayam ti buridekda. Kabaelanda met, kailian. Mano met laengen aya ti bayad ti maysa a bola ken ti ring ken ti uniporme iti basketbol no kayatda ti gumatang nga aggasawa? Ala, ket innem laeng ti edad toy buridekda ngem arapaapnan iti agbalin a nalatak a basketbolista kas ken ni Michael Jordan. Isu a sangkadagullitna ken ni amana a gumatang iti uniporme a numero 23.
“No mangabakak iti mahjong, balong,” inkari ni pulano. Makabulan a naguray ni balong iti dayta a kari ni amana. Ngem kari nga intayab ti kali a kunada. Ad-adu met a maabak ni pulano. No mangabak man, mapan met iti arak a pagbalatona iti arak kadagiti miron.
Wen, kari-kari ti kari ni pulano. Ngem saan met a tay naimas a taraon tapno agtig-ab koma ti anakna iti busogna.
Mano met laengen aya no inna iggatangan ket agasideg met laeng ti balayda ken ti department store?
Nauma ni ballong. Insublatna a kinulit ni pulana nga inana.
“No mangabakak iti hueteng, balong, inta gatangen!”
Maysa nga aldaw, nangabak ni pulana iti hueteng. Nakurang a beinte mil. Naragsakan ni ballong ta sigurado la ketdi nga gumatangen ti inana iti bola, ring ken uniporme.
Ngem ti ur-urayen ni ballong a mapatgan a kari, dina nauray. Nadamagna laengen a naipaabak met laeng ti inana ti inabakna ta nagadu a numero a pinustaanna iti nagdadakkel.
Idi saludsoden ni ballong no addan nagatang ti inana, nagadu a pambar daytoy. Into kano maminsan pay a mangabak, uray ta nagpipintas dagiti tagtagainepna a pangalaanna iti sumada.
Nagtubo la ket ngarud ti sakit ti nakem iti naganus a panunot ti ubing. Naimula iti panunotna ti kinabal-balatong ti ina ken amana. A dida ammo a tungpalen ti karida.
Inaldaw a mapan ni ballong iti department store tapno inna buyaen ti ar-arapaapenna nga ay-ayam ken uniporme ni Jordan.
Maysa nga aldaw, iti kellaat nga ibaballasiwna iti kalsada, naatalan iti trak. Intarayda ti ubing iti ospital. Sibibiag pay idi datngan da pulano ken pulana. Naggapu dagiti dua iti madiongan.
Sakbay a natay ti ubing, dinamagna iti ama ken inana no nagatangdan ti bola, ring ken unipormena.
Wen, ballong, adda idiay balay. Itedminto kenka no malainganka, kinuna ni pulano.
Immisem ni ballong. Madamdama, inkidemnan ti matana.
Nagarbo ti massayag ni ballong. Nakanginngina ti lungonna. Agka-kapintas dagiti sabong a ginatang da pulano ken pulana. Abunaw dagiti masaramsam dagiti agsusugal iti madiong, tong-it ken uray pay dado.
Iti umuna a rabii a pannaka-imassayagna, nadlaw dagiti tattao ti baro a bola, ring ken uniporme a namarkaan iti Jordan iti likud ken numero 23 iti sango iti asideg ti lungon. Naammuanda a sagut dagiti agassawa iti anakda ket ipabalonda kenkuana iti pannakaitabonna.
Dinaydayaw dagiti nakimassayag ti inaramid dagiti agassawa. Nga uray iti ipupusayen ti anakda ket intedda pay laeng dagiti arapaapna a regalo.
Ngem ti dida ammo, kiniddaw daytoy ti ubing idi sibibiag pay. Kid-daw a saan a napatgan. Kari a saan a natungpal.
Ninana, kailian, umisemka wenno agpupudotka? He-he. Irony, ania? No idi sibibiag pay la ti anakda ket ginatangdan dagitoy nga ay-ayam, di saan koma a natay ti anakda? Ania pay la ngarud ti rason a ginatangda ti bola, ring ken uniporme ni Jordan? An-anuenda pay ngarud ti ruot no natayen ti kabalio? Sus!
Ala, maysa laeng daytoy a pakasaritaan ti biag, kailian. Ket sapay koma ta saan a “darat” ti inka sinagat, no di ket balitok a sursuro.
Ala ngarud, babayu!