MAREGMEG TI BALITOK: Pananggundaway

PAGSASAO: Pananggundaway ket liklikan tapno malisian pakaibabainan.

Ania ti seymo, kailian? Mayatka iti kunak? La ketdi a. Direkta daytoy a pagsasao a di nailemmeng iti metapora a kas kadagiti dadduma. Saanen a nasken nga ibuksilam. Saan a kas iti tahong a nasken a paburkem samonto makan ti bagasna. Wenno tay prutas a nasken nga ukisam santo mananammo ti sam-itna. Labus daytoy a pagsasao a kas iti kumanagkag nga apo bulan no tiempo ti kabus.

Ngem,  saan a nalawagan ti kabus ti tuktok ni Nana Intang. Isu a nakapanunot iti nalidem a nangipaay  iti nalidem a biag wenno pakasaritaanna ditoy rabaw ti daga.

Adda sikap ni Nang Intang. Ngamin, napaliiwna ti panagpiar dagiti agtagtagilako iti tiendaan ti ilida kadagiti kapurokanna iti man groseria, sidaan, karnean ken natengan. Iti dayta a napaliiwna, dimteng kenkuana ti “lenned” a panagpampanunot.

Maammuan ti sibubukel a purok no mapan makitienda ni Nana Intang. Di agbayag, adun ti agpaw-it kenkuana. Kaykayat met daytoy ni Nana Intang. Kayatna uray aginaldaw a mapan iti tiendaan ken adu dagiti agpaw-it kenkuana lalo dagiti agpautang iti kastoy ken kasdiay ken ni pulano wenno ni pulana.

Inniat sikapna, kunam, kailian? Dika maganatan. Cool-ka lang. Dimo unaan ti iskrip. Siempre, no umunaka, ‘nia pay nay ti ibaga, ket ammomto metten, he-he!

No adda agpaw-it kenkuana babaen ti utang, ilak-amna metten ti para kenkuana. Bassit laeng tapno di madlawan.

Kas koma itoy: Nagbilin ni Minda a yutanganna iti para pansit iti groseria ni Ang Ga Poh. Ngem ti di ammo ni Minda, ilak-am metten ni Nana Intang ti sangaputed a sabon ken maysa a betsin a para kenkuana a mailista iti nagan ni Minda.

No adda agibilin nga umutang iti karne, ilak-amna metten ti wamport a para kenkuana wenno saan, pumillas iti isagpawna.

Kasta met laeng iti sida, no dina kutoan, mangilasin iti ituno wenno ipritona.

Kasta met laeng iti natengan. Kissayanna wenno mangala met iti para kenkuana iti nagan ti immutang.

Iti kastoy a wagas, makalibre iti sidana wenno aramatenna iti kusina. Mautek met ni Nana Intang, lakay! No koma   nakaadal ti baket, sigurado nga agbellad a baknang. Dakes laeng no agbalin nga empleado ti gobierno, he-he, todas ni laing, sigurado a kurakotenna amin a kaha. Kaha, kunam?Mabalin pay a saan laeng a ti linaon ti kaha ti alaenna no di pay agraman kaha tapno awan ebidensia! He-he.

“Ay, kumari, agbambannogka pay la a mapan idiay tiendaan, siakon ti mangala para kenka,” daytoy ket ti pasakaliena.

Wenno: “Ay, kumari, sananto ipikpik wenno ikidday, siakon ti umutang ken Ittong iti pulotanyo no malem.”

Iti dayta a balikasna, agtalgedka la ketdi a mangipalubos nga adda pay kanayonna a panagyaman iti “kinaimbagna”.

Immabut iti sumagmamano a bulan ti kasta nga aramid ni Nana Intang. Ngem di mabayag, dimlaw dagiti kapurokanna ta adda metten dagiti banag a masukalanda nga utangda nupay awan malagipda nga inutangda. Nadakamat ti maysa daytoy a naduktalanna iti kaarrubada. Anian a pannakasdaawna ta kastoy met ti problema ti kaarrubada. Nagwaras ti innusisa. Ditoy a nabuking ti modus operandi ni Nana Intang.

Ita, awanen ti agtalek kenkuana. Liblibianda wenno katkatawaandan ti likudanna. Adda pay mangipaspasagid a limmukmeg iti pananggundaway. Agasem, yutangna ti maysa a tao iti laksid ti pannakaammo daytoy? Yutangna a simumulagat, he-he! 

Ti inaramid ni Nana Intang ket maysa a pananggundaway iti padana a tao. No di koma ginundawayan ni Nana Intang ti panagtalek dagiti kapurokanna, di koma naibabain. Ngem awan ti madi nga aramid a dinto maibulgar iti kamaudianan. Ngamin, saan nga agbunga iti naimbag ti pananggundaway.#