Footer

MAREGMEG TI BALITOK: Sennaay ti Nasugatan a Puso

Ti Namarsua ti pagtaudan ti sirib, pigsa ken kired nga usaren tapno maaddaan iti panagtalek iti bagi. Daytoy a panagtalek iti bagi ket ad-adda pay a rumungbo no adda panagtalek iti pada a tao, partikular kadagiti balakad iti rumbeng ken umno nga aramiden.

Kas ken ni Manang Conchita, maysa a homemaker wenno agtagibalay nga ina. Nasaliwanwan ti panagbiagda nga agassawa ken dagiti uppat nga annakda. Nasingpet ken managayat ti asawana. Good provider ta malaksid ti kinadakkel ti sueldona iti pagpapaayanna a bangko, adda pay dagiti dadduma a pagpastrekanna iti kuarta. Isu a di kasapulan nga agtrabaho ni Manang Chita.

Ngem kellaat a dimteng ti allawig iti biagda. Naaksidente ti asawa ni Manang Chita. Nabayag a naggian iti ospital gapu ta naipit iti luganna a nakatukkolan dagiti paragpagna. Dakkel ti nabusbosda iti ospital ket nadakamatda amin nga urnongda a kuarta. Kalpasan ti nasurok innem a bulanna iti ospital, natay ti asawana.

Sineknan iti buteng ni Manang Chita iti kellaat nga ililidem ti dati a naraniag a masakbayanda. Nagamak a dina kabaelan nga ilangoy dagiti annakna.

Nupay relihiosa ni Manang Chita, no dadduma kullaapan ti simmangbay nga allawig iti biagda ti panunotna ket dina maalluadan a di damagen iti Namarsua no ania ti nagbasolanna ta isu pay ti nakapasamakan iti kasta a rigat ken pannubok a di ket koma dagiti managdakdakes a tattao. No apay a ti asawana ti natay a saan ket a dagiti agraraira a kriminal.

Ngem tao laeng ni Manang Chita. Talaga a dina malapdan a seknan iti ngatangata iti kinakuyem ti panunotna gapuen iti dimteng nga allawig wenno bagyo.

Naimbag laeng ta silulukat ti panunotna kadagiti padana a tao ket dimngeg iti patigmaan. Naikkan iti pammakired iti bukodna a bagi a kabaelanna nga isakad dagiti uppat nga annakna uray no awanen ti asawana.

Babaen ti kuarta a naawatna manipud iti bangko a nagtrabahuan ti asawana, nagnegosio ni Manang Chita. Buy and sell. Gapu ta nalaing iti sales talk, immadu ti klientena. Iti panagballigi ni Manang Chita, nagsubli ti pammatina iti Namarsua.

Ita, napagadalnan amin dagiti annakda ket addan natalged a pagsapulanna. Awanen ti birokenna pay iti biag. Ngem no malagipna daydi panawen a dandani napukawna ti panagtalekna iti bagina ken iti iseseknan ti panagpangaduana a mangsango iti biag nga agmaymaysa, pamrayan ni Manang Chita ti mangiyebkas iti panagyaman iti Namarsua agsipud ta naikkan iti kired ken pigsa a nangibaklay iti pagrebbenganna kadagiti annakna kalpasan ti pannakapukaw ti adigi ti pagtaengan a binangonda ken ni lakayna.

Kasla pilid nga agtultulid ti biag. No dadduma, addaka iti ngato, iti sikigan wenno iti baba. Saan nga agnanayon nga addaka iti baba wenno sikigan, adda met panawen nga agindurogka iti ngato. Ngem no addakan iti ngato sa kellaat a bumabaka, saan a panagbaybay-a ti Namarsua ti sasaadem no di ket pannakatenneb ti kinataom, ti pammatim iti Namarsua ken iti padam a tao tapno ad-adda pay a narangrang ti ik-ikutam a saguday ken maitag-aymo ti kinataom.

Saan nga agsisina ti pammati iti padam a tao, pammati iti bagim ken pammati iti Namarsua. No awan ti maysa kadagitoy, nakurang ti pagsammakedam a sumagpat iti balligi. Awan serbina nga agtalekka iti padam a tao no awan met ti pammatim iti bagim ken iti Namarsua. Nasipnget a dana ti biag ti kastoy. Saan met a nasayaat nga agtalekka iti Namarsua nga awan ti panagtalekmo iti bagim ken padam a tao. Awan met ti serbina a mamatika unay iti bagim ngem dimo patien ti padam a tao ken Namarsua ta kinatangig ti kastoy.

Isu a nasken nga adda amin dagitoy iti panagdaliasat iti dana ti biag. Awan ti maikkat uray no maysa kadakuada ta dagitoy ti pagkaptan a salakan iti idadateng ti pannubok ken allawig iti biag.

Reperensia: Job 7:1-4, 6-7; Ps 147; 1 Cor 9:16-19, 22-23; Mk 1:29-39. #