MAREGMEG TI BALITOK: Ti Agek ni Judas

Pagsasao: Ti agek ni Judas ti kaalasan iti naalas.

Mabalin a dika mamati, iti daytoy, kailian. Ngem dika Kristiano no dika mamati itoy. Wenno saan, ateistaka, Moslem, Shintaoist wenno Confusionist. Ta awan ti patneng ken agin-agin a Kristiano a di makaammo ken Judas Escariote. (Sabali ni Judas Tadeo). Ni Judas Escariote ti nangagek ken nangliput iti Maestro gapu laeng iti tallupulo a pedaso a balitok.

Panangliliput wenno pammarang nga aramid ti tarus daytoy a pagsasao, kailian. Pakitang-tao.

Pagsasao a pakaadawan met iti maregmeg ti balitok iti nadawel a karayan ti biag. No dagiti naimbag a banag manipud iti idasarko a pakasaritaan iti biag ti sinagatmo nga “ibetsin” iti biagmo, maregmeg ti balitok dagitoy. Iti sabali a bangir, no ti kasunganina ti sinagatmo, ay, darat laeng ti kaibatoganda, kailian!

Awan ngatan ti makaartap iti panagayat ni Marie ken ni Dionie. Agtagibalay ti ni Marie, homemaker a makuna. Nangato ti saad ti asawana iti gobierno. Dua ti anakda, babai ken lalaki.

Adu ti umapal iti ayan-ayat dagiti dua. Saan nga agkupas ti kinasam-it ti ayan-ayatda. Ordinario laengen a buya kadagiti kaarrubada a no rummuaren ni Dionie a mapan agtrabaho, adda pammakadana a bisito ken ni misis iti ridaw. No sumangpet ti lalaki iti malem, sumipnget wenno naladaw a rabii, sumabat ni misis sa umarakup ken umagek.

Saan a pumanaw ken ni mister no awan ti imalditna nga agek ken ni baketna.

Kastoy met ti aramid ni Dionie kadagiti annakna. Saan a kumpleto ti aldawna no dina kusuen ti buok ken agkan dagiti annakna . A kasla ketdin daytoy nga agek ti pigsana ken siribna nga agipatungpal iti takemna iti gobierno. A kasla dayta ti puon ti biagna. Ti puon ti ragsakna.

Ni Marie, ayna, naggayad ti isemna no dayawenda ti panangipateg ni mister kenkuana. Very sweet ni mister, kunam man. Saan laeng a sweet, good provider pay. Malaksid iti trabahona iti gobierno, adda pay sidelinena: underwriter iti non-life insurance. Agsipud ta graduado iti accounting, adda dagiti klientena a babassit a negosio.

Ngem iti maysa nga aldaw nga agpaspasiar dagiti agiina iti downtown, nakita ni Marie nga adda babai nga aklili ni lakayna bayat ti iseserrekda iti maysa a nalatak a restaurant.

Kayat ni Marie a mapan komprontaen ni lakayna. Ngem eskandalo la ketdi ti parnuayenna no kasta. Ken ammona kadi no kaopisinaan laeng ni Dionie ti babai?

Saan nga impadlaw ni Marie ti nakitana kadagiti annakna. Ngem adda main-inaw a panagduadua iti barukongna. Dina maako nga adda sabali a babai iti biag ni Dionie.

Iti dayta a rabii, saan a simmabat ni Marie ken ni Dionie iti ridaw. Awan ti naimaldit nga agek iti lalaki.

Sinumaria ketdi ni misis ni mister maipanggep iti nasukalanna. Ngem pinaglibakan ni Dionie nga adda babaina. Kaopisinaanna kano ti nakita ni baketna. Nagkakamakam nga agek ti immalditna ken misis idinto nga inyarasaasna a ni laeng Marie ti babai iti biagna.

Naala met iti lamlamiong ni Marie. Namati a saan a babai ni Dionie ti nakitana.

Ngem adda dagiti aldaw a seknan ti panagduadua. Ta pasaray makasukain iti withdrawal slip manipud iti ITM ni Dionie. Dadakkel met ngarud ti mairuruar a kuarta. Pangip-ipanan ni Dionie ti kuarta?

Adda pay maysa nga aldaw a nakasukain iti nalabbasit iti kuelio ti puraw a kamisadentro ni Dionie. Idi damagenna ken ni lakayna, kinunana a naisagidna ti tomato sauce ti hamburger a ginatangna a meriendana.

Masansan payen a marabian ni Dionie a sumangpet. Adda kano miting a dinar-ayanna. Wenno saan, nagobertaim iti opisinada. Wenno napanda nga agbabarkada nagpalukay iti tornilio iti maysa a paginuman.

Ngem pamrayan laeng a kutien ni Marie ti abagana agsipud ta awan met ti mapaliiwna a nagbaliwan ni Dionie. Adda latta imalditna nga agek tunggal pumanaw santo umarakup no sumangpet. Kumpleto met ti sueldo nga iyawatna tunggal bulan. No dadduma, dakkel pay ti bonusna nga ited ni lakayna.

Nagtuloy ti naragsak ken natalna a panagbiagda.

Ngem maysa nga aldaw, pinagpiestaan dagiti reporter ti radio ken pagiwarnak ti damag: ni Dionie ken ni Beth, kaopisinaanna, pinaltogan ni Andrew, asawa a balikbayan ti babai. Nalimed a nagawid ni Andrew kalpasan a nakaawat iti pulong ti kabsatna nga agay-ay-ayam iti apuy ti asawana. Siniim ni Andrew ti asawana. Sinurotna ida ket nakitana nga immunegda ken ni Dionie iti maysa nga apartment. Nagsipnget ti panagkita ti balikbayan ket pinaltoganna dagiti dua. Saanen a naidanon iti ospital ti biag da Donie ken ni Beth.

Adu dagiti reporter a mayat a mangala iti kapanunotan ni misis maipapan iti kaso, ngem nagkitakit. Nagpakni iti siledna. Nagsangsangit piman iti sakit ti nakemna. Dina maako a liniputan ni lakayna. Awan met ti ammona a nagkuranganna. Impatpategna ni lakayna. Intedna amin a kasapulanna kas asawana.

Ngem naamirisna a parparawpaw la gayam ti panagayat kenkuana ti asawana. Pinangabbong la gayam ni mister iti nalaad nga aramidna dagiti agekna. Agek ni Judas, kailian!

Saan laeng nga ipakita no di pay iparikna ti panagayat, kailian. Kastoy ti mensahe daytoy a pagsasao. Daytoy ti maiparbeng.

Ala, ngarud, babayu!#