MAREGMEG TI BALITOK: Ti Akkub ti Libro

PAGSASAO: Dimo ibuksilan ti linaon ti libro babaen ti akkubna.
Figurative daytoy a pagsasao, kailian, isu a nasken nga ibuksilan iti
literal a kaipapananna tapno nalaklaka a maawatan. Nalaklaka nga
analisaren no kastoy ti pamay-anta.

Saan a ti libro a basaen ti kayat a sawen daytoy a pagsasao. Wenno, saan a ti akinruar a paset ti tao ti madakdakamat. Saan a ti langa no di ti ugali. Saan a ti pisikal a makitam no di ti adda iti unegna. Adda ngamin dagiti agbibiag a nasimple, idinto ta adda met dagiti agbibiag a naparammag.

Uray iti literal a kaipapanan, dimo maibuksilan ti linaon ti libro babaen ti akkubna. Saan a gapu ta makaawisen ti akkubna, napintasen ti linaonna? Saantayo a maibaga ti kasta. Adda dagiti libro a nagpintas ti disenio iti akkubna ngem  awan met ti nabagas a mabasa. Agingga a dimo mabasa ti linaon ti maysa a libro, dimo kunaen a napintas ta mabalin a kasungani ti kapintas ti akkubna ti nagunegna.

Isu a no mapanak iti bookstore nga aggatang kadagiti basaek, dagiti maiwalwalin ken simple a libro a pasaray awan ti paulona iti ruar ti kaunaan a pidutek. Naynay ngamin a kastoy ti pakasarsarakak kadagiti nababaked a sinurat iti literatura.

Dimo ibuksilan ti linaon ti libro babaen ti akkubna. Saan a naibugasan daytoy ni Benilda, cum laude a nagraduar iti BSEEd. Maikawalo ni Benilda a kangatuan iti Professional Board Examination for Teachers, nga itan ket Licensure Examination for Teachers.

Gapu iti kinangato ti nagun-odna iti eksamen, limmastog ni Benilda.  Nagbalin a pugot. Natangig.

“Oy, propesional daytoy!” sangkapasawna uray awan pay ti trabahona. Pagkaritnan ti propesionna. No adda dina kayat iti maysa a tao, asinoka man a pulano wenno pulana, dinaka atrasan. “Propesional daytoy, dugyot!” kunana sana pay ibaniekes.

Uray baket wenno lakay dina dayawen. Nangato a talaga ti puruana.

“Ti laeng padak a propesional ti agarem kaniak!” kunana nga imulagat ken ibanniekes kadagiti babbaro iti purokda a mangipakpakayabkab ti ayatda kenkuana.  Kuna ngarud dagiti dadduma a terror teacher la ketdi no mangisuronto. Namak payen no agbaut wenno agpungot wenno kumuddot? Susme!

Adda bakante iti eskuelaan iti kabangibang ti barangayda. Mapagpagna manipud iti balayda. Isu nga awitna ti rekomendasion ni mayor. A sinal-it kadagiti amin a kasasal-itan nga aramid ni Pinoy, ta apay ketdi a no sumrekka iti trabaho kadagitoy a panawen, lalona iti gobierno ket dakkel ti puntos ti endorsement manipud iti maysa a politiko. Agpayso ti pagsasao a “saan a ti inadalmo ti pakastrekam iti trabaho no di ket no asino ti nangipastrek kenka..

Iti dayta a bigat, napan ni Benilda iti opisina ti district supervisor iti kabisera. Naglugan iti mini-bus. Adda nakadalapus kenkuana a baket ket naregregan iti libro ti sakana.

“Punieta! Dugyot a baket! Mamirmiraotka la ngaruden, tangaka pay laeng! Kayatmo ta ipungotpungotka?” imbanniekesna.

Nagpadispensar ti baket, simple laeng ti langana, adu ti awitna a pappapeles ken libro.

Ngem, saan a nagpatingga dita ti pudot ti ulo ni Benilda. Tumanabutob latta a pangpangeganna ti baket. Di nagtimtimek ti baket uray no lumablabbasiten iti bain kadagiti padana a pasahero. Ammo ti baket nga awan serbina a tutopanna  ti kas ken ni Benilda.

Nakadanon ni Benilda iti kabisera. Nagpa-beauty pay sakbay a napan iti opisina ti district supervisor.  Malaksid a cum laude idi nagturpos, maikawalo pay iti LET, sa awitna ti rekomendasion ti mayor, ken iti dayta a pustorana, siguraduenna a maawat a dagus.

Adda sangaili ti district supervisor ket pinaguray ti clerk. Nakasiksikkil ti tengnged ni Benilda bayat ti panagtugawna. Sangkakita ti clerk ket ad-adda manen ti tingigna. Agraem la ketdi ti clerk iti kapintasna.

Rimmuar ti sangaili ti district superbisor. Insenias ti clerk ti iseserrekna. Nangigis ti isem ni Benilda a nangpusipos iti serradura.

Kellaat, napunas ti isemna idi maitangkarang kenkuana ti rupa ti adda iti likudan ti swivel chair.  Ti baket a nagsasawanna iti mini-bus! Ngek!

Natural, saanen a nagtuloy a nagpainterbio ni Benilda. Ania pay ti rupana a sumango iti district supervisor kalpasan ti inaramidna? Ngem ketdi, daytoy a napasamak kenkuana ti nangpabalbaliw iti ugalina a di nasayaat.#