MAREGMEG TI BALITOK: Ti Annongen ti Maysa a Babai

DIAK KOMA suraten daytoy ta amkek a makasugatak iti rikna, lalo iti biang dagiti babbai ngem nasaysayaat a mailawlawag ti kinapudno a rumbeng a mapasamak iti maysa a pamilia, ti akmen ti asawa a babai, kasta met ti lalaki. Total, addaan daytoy a topiko iti nasiken a pagbatayan iti Biblia. Ken maysa, nasaysayaat a trataren dagiti banag a manglukat iti kinapudno.

Pakasaritaan daytoy dagiti agassawa a Mando ken Aning. Awan ti pakaidumaan iti ordinario nga agassawa da Mando ken Aning. Ti la pakaidumaanna, Andres ni Mando. Tapno nalawlawag, ander di saya, kunak man laengen.

Kuna dagiti sutil a gagayyemko a dakkel a pamilawanda ken ni Mando ti naipanurok a kinaander di sayana. Kunada nga uray isuda, ander ti sayada met sada ipasarunson nga igarikgik nga iti laeng rabii.

Uray dagiti dadduma a gagayyemko, kunada a pagaayatda ti balikas nga “andres” aglalo no baliksen dayta ni baketda no kasdiay a nakaturogen dagiti annakda wenno kasdiay a kadigdigosna ket agad-adiwara ti banglona.

Ngem sabali nga “andres” ni Mando. Para laba, para luto, para innaw, para dalus, para pakan iti baboy. Para… amin sa nga aramid iti balay. Trabaho amin ni Mando dagiti trabaho iti uneg ken ruar ti balayda. Para aw-awir pay kadagiti tallo nga annakda.

Ti rigatna, no agbiddut ni Mando, makangeg pay laeng manipud ken ni Aning iti sao a di malamut ti aso. Nakarkaro manen no maabak ni Aning iti tong-it wenno napungkit ti alagana a numero iti anak ti sinal-it a hueteng, makaraman ni Mando iti pateltel, kuddot wenno tambiog iti bukot.

Ngem iyis-isem laeng ni Mando dagitoy a panangtratar kenkuana ti asawana.

“Dinton maulit daydiay a biddut, dir,” pangay-ayona iti baketna.

Ngem ti makapadakes, nagbalin a paidam ni Aning. No kasdiay a kumayetket ni Mando iti sarsardam a panagatibuor ti banglo ti dama de noche iti paraanganda sa umapros ken nakaum-umbi ti arasaasna, uray la mapaanikki iti panagdisso ti siko ni baketna iti bakrangna sa ti panagballikidna daytoy a mangtallikud kenkuana.

Piman ni Mando, anusanna laengen ti mangmulmulengleng iti panagkinninnit dagiti alutiit iti bobeda ti balayda.

Ngem mamindua tunggal lawas, Mierkoles ken Domingo nga igatangan ni Aning ni Mando iti marka demonio. Isu payen ti manglukat ken mangpainom ken ni lakayna tapno kano, nadaras a makaturog ken makainana iti rabii ta adu ti trabahuenna iti kabigatanna. Napalalo met a ragragsak ni Mando gapu iti “panangipateg ken panangilala” ni Aning kenkuana.

Gayam, no kasta nga agur-uroken ni Mando iti bartekna, paulien metten ni Aning ti lalakina ket isudan ti agbartek iti maiparparit nga ayat!

Ngem kastay kunada, awan ti agbilang a saan nga agpullo. Adda tiempo a mapunno ti batia iti tedted ti danum. Dimmanon ti tiempo a naungpot ti tali ti aanusan ni Mando aglalo idi makaangoten iti “lugit iti manok” iti tuktokna. Maysa nga aldaw, kellaat lattan a nagpukaw. No sadino a lugar ti naturongna, awan ti makaammo.

Nakikabbalay ni Aning iti lalakina. Ngem adda gayam asawa daytoy ket iti maysa nga aldaw, nangeg laengen dagiti kaarruba ti panaglaawlaaw ti babai iti sanguanan ti balay da Aning.

Manipud idin, saanen a nagparang pay ti lalaki ken ni Aning.

Nagparikut ni Aning ta awan ti ammona a trabaho. Ania ngarud ti ipakanna kadagiti annakna? Di met ngarud mabalin nga apuyen ti bingkol ken angren ti bato.

Kuna ti Efeso 5:22-24: “Babai, paiturayankayo iti asawayo, kas iti panangituray ti Apo kadakayo. Ta adda turay ti lalaki iti asawana a kas met iti kaadda ti turay ni Cristo iti iglesia… Iti kasta, masapul a paiturayan dagiti babbai kadagiti assawada iti amin a banag, a kas met a paiturayan ti iglesia ken ni Cristo.”

Daytoy koma ti rumbeng a sinurot ni Aning iti panagbiagna. Saan koma a pinanawan ni lakayna no pinaiturayan.

Paiturayan. Daytoy a balikas ti lilibeg ti saan a panagkinnaawatan. Ngem mabasa iti Efeso 5:21: “Paiturayankayo iti maysanmaysa gapu iti panagraemyo ken Cristo.” Kayatna a sawen, masapul nga adda panagpapada, saan a nangatngato ni babai wenno ni lalaki. Agkatunosda koma iti amin a banag, iti pangngeddeng, iti arapaap ken tuntun-oyen a panagbiag a karaman dagiti bungada. Awan koma ti maan-ander wenno maan-andres.

Mabasa iti Colosas 3:18-21 ti annongen ti naragsak a pamilia: “Babbai, agtulnogkayo kadagiti asawayo, ta dayta ti rebbengenyo nga aramiden a kas kristiano. Lallaki, ayatenyo ti asawayo ket diyo rangranggasan. Annak, agtulnogkayo kadagiti nagannak kadakayo ta daytoy ti makaay-ayo iti Dios.”

Ala, ngarud, babayu manen!