MAREGMEG TI BALITOK: Ti Kukotel a Basol

Adda dagiti gundaway a nasken a tumapog ti tao iti kapitakan tapno laeng isalbarna ti napateg kenkuana nupay mailaksid iti bukodna a prinsipio, kapanunotan wenno pammati daytoy nga itatapogna.

Kas ken ni Dio, accountant iti dakkel a kompania. Tao ni Apo Dios a makuna ni Dio. Ngamin, impasagepsep kenkuana dagiti dadakkelna ti nakristianuan a panagbiag. Dimmakkel a nalinteg. Awitna ti panagbuteng iti Namarsua ken iti padana a tao a makaaramid iti basol ken maikaniwas iti linteg.

Ngem nasken dumalan ti balitok iti apuy tapno ad-adda a tumarnaw ti silengna. Naatake ti ina ni Dio. Kasapulanna ti operasion tapno maisalbar ti biag. Naipasungalngal ni Dio iti nagsanga a dalan. Awan ti umdas a kuartana a mangpaopera ken ni inana. Ngem adda kuarta ti kompania iti ikutna. Ania ti aramidenna? Ammona a maysa a basol ti aramidenna no kautenna ti kuarta ti kompania. Ngem iti sabali a bangir, biag ti inana ti nakataya.

Nagikeddeng ni Dio. Kimmaut iti kuarta iti kompania. Inkarina iti bagina a sukatanna a dagus no maalana ti loanna iti bangko.

Ngem gapu ta dimmakkel a managbuteng iti Dios, sinidir ti konsensiana iti inaramidna. Sineknan ti pannakariribuk. Dina ammo ti aramidenna ket dina maiyulo ti agtrabaho. Ti inaramidna ti in-inut a mangpatpatay kenkuana.

Nadlaw ti akinkukua ti dakkel a nagbaliwanna. Ngamin, ni Dio ti magustuanna kadagiti amin nga empleadona. Dandanin agretiro ti akinkukua ket isagsaganana a sililimed ni Dio a mangsukatto kenkuana.

Maysa a malem, pinaayaban ti akinkukua ni Dio iti opisinana. Imbagana dagiti napaliiwna. Dinamagna no ania ti nadagsen a problema ni Dio.

Naisagana metten ni Dio ti bagina a dumteng ti panawen a mailatak ti inaramidna. Ngem iti panagsaludsod ti akinkukua, nakunana iti bagina nga ipudnona laengen ti inaramidna a dinan iyuray a maipalgak ti basolna babaen ti sabali. Nagpudno. Inakona ti basolna. Impalawagna ti amin. Kinuna a sidadaan nga umawat iti aniaman a pannusa a katukad ti basolna. Uray la nakasangit iti panagpudnona.

Mannakaawat met dagiti akinkukua ti kompania ket pinakawanda ni Dio. Rinaem ketdi ti akinkukua ni Dio gapu ta impudnona ti inaramidna.

Iti biang ni Dio, kalpasan ti panangipudnona iti basolna, kasla adda nasuat a siit iti kaungganna. Nagsubli ti ganaygay ken naraniag a sirmatana iti biag.

Kastoy ti basol. Agingga a ditayo maipakawan, saantayo a makarikna iti kinaragsak agsipud ta adda maparnuay a giwang iti nagbaetantayo ken iti Namarsua. Ngem no maikompesar ken maidawatantayo iti pammakawan, aglumen daytoy a giwang ket maipasngay ti baro a biagtayo.

Ta kayarigan ti basol ti maysa a kukutel nga in-inut a mangrunot iti bagi ken sibubukel a kinatao. Agsipud ta maysa a kukutel ti basol, saan ngarud a rumbeng a taraknen wenno idulin iti kaunggan wenno kemkemen lattan. Masapul a maagasan a dagus. Masapul a madalusan tapno agimbag ket maguped ti pannakatuok. Kastoy ti nakristianuan a panagbiag. Nasken ti panangdalus ti bagi iti kukutel a basol.

Ta iti laeng pannakapakawantayo ti pakagun-odantayo iti pannakadalus. Agingga a saantayo a nadalus, saantayo met a magun-od ti makapnek a ragsak, talinaay ken pia.#