Marihuana, dakkel a negosio: Bataoil

ALILEM, Ilocos Sur – Kinuna ni PNP Regional Director Police Chief Supt. Leopoldo Bataoil a narigat a mapaksiat ti panagraira ti marihuana ta dakkel a negosio daytoy ket kasapulan ti agtultuloy nga operasion maikontra iti daytoy illegal nga aramid.

“Saan a talaga a magulpe a mapaksiat dagiti agmulmula gapu ta dakkel a kuarta ti adda ditoy. Masapul nga adda sustainability ti operasiontayo,” kinuna ni Bataoil iti pannakiuman ti lokal a media kenkuana itay nabiit.

Aganay a 89 a milion ti pategna a mula a marihuana a naimula iti tallo ektaria a plantasion iti nagbeddengan ti Ilocos Sur ken Benguet ti pinarut ken inuram dagiti operatiba ti PNP PRO1 ditoy nga ili itay laeng nabiit.

Segun ken ni Bataoil, Demand Deduction Drive ti kasapulan tapno maksayan no di man mamimpinsan a mapukaw ti problema iti droga. Maysa kadagiti kasamayan a wagas nga isaysayangkat ita ti PNP ti panangisayangkatda iti “pulong-pulong’ iti agduduma a pagadalan ditoy Rehion I tapno maiyadal kadagiti agtutubo ken estudiante ti dakkel nga epekto ti droga.

“Masapul nga ibiag dagiti kameng ti PNP ti battlecry ti PRO 1 a “Winning wars, Touching People’s Lives,” kinuna ni Bataoil.#