Market supervisor, naballakadan nga aglusulos

SINAIT, Ilocos Sur – Binallakadan ti maysa a konsehal ti superbisor ti tiendaan ditoy nga aglusulos laengen no saan nga italtalek dagiti agpaspasada iti traysikel ken dagiti aglaklako iti pannakaurnos ti panagpuesto dagitoy iti tiendaan.

Sakbayna, nidanon iti konsehal dagiti reklamo dagiti makitienda iti nakiro a panagparking dagiti traysikel ken panagpuesto dagiti aglaklako iti lasona ken bawang iti tiendaan nangruna iti  Biernes, aldaw ti tienda ditoy nga ili.

Kiniddaw ni Konsehal Jose Pepito Zapata ken ni Market Supervisor Joel Ibe nga urnosenna ti panagparking dagiti traysikelan ken puesto dagiti aglako iti lasona ken bawang ngem insungbat ti naud-udi a kinapatangna metten dagitoy ngem saanda nga italtalek.

Nakuna la ket ngarud ni Zapata nga aglusulos laengen ni Ibe no saan a patpatien dagiti agpaspasada ken aglaklako ti pammilinna.#