Martiallaw Ferdinand, natiliwan nga agikut iti paltog

SINAIT, Ilocos Sur – Nairanrana wenno saan, maysa a lalaki a naipanagan iti daydi linteg-militar nga improklama daydi nag-Presidente Ferdinand Marcos ti nasukalan dagiti polis a nagtagiimet iti paltog bayat ti panaginumna iti maysa a tianggi sadiay Barangay Purag idi agarup alas 5:00 ti malem ti Septiembre 25.

Natiliwan a nagikut iti paltog ni Marshallaw Ferdinand Ibañez y Yabes, 39, baro, mannalon ken residente iti Barangay Masadag ditoy nga ili bayat ti panaginumna iti tienda ni Marissa Caluntad.

Segun iti report, bayat ti panagiwaywayat dagiti polis-Sinait nga indauluan ni OIC Chief Inspector Greg Tuzon Guerrero iti Oplan Bakal/Sita kadagiti nadumaduma nga establisimiento ken restaurant iti hurisdiksionda, nakapkapanda ni Ibañez nga adda ikutna a CZ 2075 Rami P 9mm nga addaan iti maysa a magasin a nagkarga iti 4 a bala.

Idi awan ti naipakita ni Ibañez  a lisensia ti paltog ken permit nga ikuyogna iti ruar ti pagtaenganna, dagus a kinumpiskada dagiti polis ti paltog sada inimbitaran daytoy iti police station.

Iti pannakaisurat daytoy, adda iti kustodia dagiti polis ti suspek agraman ti paltogna.

Maipalagip nga improklamar daydi nag-Presidente Ferdinand Marcos ti martial law idi Septiembre 21, 1972.#