Footer

Maseknanak iti seguridad ni Atong Ang – Chavit

VIGAN CITY – Kinuna ni Gob. Luis “Chavit” Singson a maseknan unay iti seguridad ni Atong Ang, ti negosiante nga Intsik a dati ken agpadpada a kasingedda ken ni Erap.

Inwaragawag daytoy ni Singson iti publiko kabayatan ti interbio kenkuana ti media iti mismo a pagtaenganna iti Baluarte ditoy itay lawasna.

“Kas naibagak idin, saanen a kasapulan pay nga agtestigo ni Atong Ang kontra ken ni dati a Presidente Erap. Makaanayen ti bilang dagiti testigo nga inakomodar ti Sandigan. Panagkitak, sumobran sa pay ketdin ti bilang dagiti mayat nga agsaksi,” panangilawlawag ti gobernador.

Kinuna pay ni Singson a nupay saan nga agtestigo ni Atong Ang, nasken latta a maikkan daytoy iti naan-anay a proteksion tapno masigurado nga awan problema iti seguridadna.

“Rumbeng laeng a maikkan ni Atong Ang iti naiget a proteksion tapno manamnama ti seguridadna. Ngamin, adu dagiti nanggurgura ken mangisiksikat iti biagna. No mapapatay, sigurado nga ipabasolda kaniak. Banag a diak kayat a mapasamak,” kinuna pay ti langilangan a gobernador.

Maipalagip nga idi napadisi ni Pres. Erap Estrada, naglibas a rimmuar ni Atong Ang iti pagilian ket napan iti ballasiw-taaw. Nupay kasta, nasalamaan dagiti autoridad ti Imigrasion idiay Estados Unidos ket naibalud.

Naideport ni Ang iti pagilian itay napan a tawen.

“Tumulongak para iti pannakaited ti naan-anay a seguridadna. No kasapulan a maiyalis iti pagyananna a pagbaludan, mapasamak a kasta,” innayon pay ni Singson.