Mass vaccination kontra kamuras, narugian

LIDLIDDA, Ilocos Sur – Narugian itay Abril 4 iti Barangay Banucal ditoy nga ili ti pannakabakuna dagiti ubbing maikontra iti kamuras babaen ti Measles-Rebulla Supplemental Immunization Activity ti Department of Health.

Impatalged ni Municipal Rural Health Unit Officer Dr. Haynadina Pascua nga agtultuloy ti panagbakunada agingga a mabakunaan dagiti ubbing uray dagiti adda iti kabambantayan a barangay ditoy nga ili.

Kinuna ti doktor a manamnama a mabakunaanda ti agarup 1,000 nga ubbing maikontra iti kamuras.

Uray nabakunaanen dagiti ubing iti kontra kamuras kadagiti napalabas a tawen, mabakunaanda manen kas paset ti nainsaknapan a kampania ti DOH para iti pannakapugipog daytoy a sakit ti pagilian.#