Masuspetsa a drug pusher, nanabtuog iti buy-bust operation

VIGAN CITY – Nanabtuog iti ima dagiti polis itay lawasna ti maysa a lalaki a mapapati nga aglaklako iti droga babaen ti buy-bust operation a naisayangkat kenkuana.

Kinemmeg ti Special Operations Group ti Provincial Police Office ni Fernando Famorca, 37, naasawaan, residente iti San Julian Norte ditoy siudad, kalpasan a nakumpiska kenkuana ti maysa a plastic sachet a mapapati a naglaon iti shabu iti buy-bust operation kenkuana iti Rizal Street ditoy siudad.

Naala pay ti undercover agent a nagpammarang a kustomer iti ikut ti suspetsa ti tallo a sag-P100 a naaramat iti buy-bust operation.

Iti pannakaisurat daytoy, maisagsaganan ti kaso maikontra iti suspetsa.