Masuspetsa a nagpuor iti kabakiran, napakawan

DEL PILAR, Ilocos Sur – Naasi dagiti barangay officials ti Barangay Afonso ken Poblacion Norte ditoy nga ili ta pinakawanda ti mangnganup a masuspetsa a nangpuor iti kabakiran ti Tawtawing Mountain idi sardam ti Enero 31, 2015.

Ni Robert Bal-is Baoilan, 46, baro, ken residente ti Sitio Tubalina, Barangay Alfonso, ti masuspetsa nga akinresponsible iti pannakapuor ti aglawa iti innem nga ektaria a kabakiran iti nadakamat a lugar.

Segun iti maysa nga opisial ti Department of Environment and Natural Resources, protektado a lugar ti Tawtawing Mountain.

Ngem kinuna dagiti barangay captain iti dua a barangay a nakinsakup iti napuoran a kabakiran a pinakawanda ti suspek agsipud ta mapapati nga addaan iti sakit a mental.

Inako payen dagiti barangay officials nga isuda ti mangmula iti napuoran a lugar babaen ti tulong ti komunidad nga iturayanda.#