Mayor, dismayado iti presio ti tabako iti napalabas a tobacco season

SAN JUAN, Ilocos Sur – Masapul nga independiente ken saan a padiktaran iti National Tobacco Administration ti agbalin a dadaulo ti grupo dagiti mannalon iti probinsia, segun ken ni Mayor Benjamin Sarmiento itay nabiit.

Kinuna ti mayor a dismayado iti panaggatangan iti tabako kadagiti trading centers a kunana a nakagundawayan dagiti agmulmula iti tabako, partikular dagiti saan a nakikontrata.

Naammuan a dagiti laeng nakikontrata ti nakaragpat iti floor price a P78 kada kilo iti Class AA a tabako idinto a nababbaba kadagiti saan a simrek iti contract growing agsipud ta dagiti laeng cowboys ti naggatang iti tabakoda.

Kanaig daytoy, binabalaw ni Sarmiento ti agdama a dadaulo dagiti agmulmula iti tabako gapu iti mapapati a saan a pannakasurot ti napag-aanamongan iti tripartite conference iti nagbabaetan dagiti mannalon ken dagiti agparpartuat iti sigarilio mainaig iti floor price ti tabako.#