Mayor Eva impaganetgetna pannakapreserbar ti estado ti Vigan kas New7Wonders Cities

Ni Imelda C. Rivero, PIA 1, Ilocos Sur

VIGAN CITY – Tapno mapreserbar ti panagbalin daytoy World Heritage City a New 7Wonders Cities of the World, indagadag ni Mayor Eva Marie Medina ti itutulong dagiti agindeg iti istrikto a pannakaigannuat dagiti pagalagadan tapno agbalin a nadalus ken naurnos ti siudad aglalo tatta ta tumuyutoy dagiti turista nga agpasiar iti siudad.

“Adda karbengan ti publiko a maikkan iti naan-anay a serbisio,” kinuna ni Medina a masapul ti panagtitinnulong a mangikkat kadagiti makatubeng iti naannayas a panagayus ti trapiko dagiti lugan kadagiti nakikipet a kalsada ti siudad, kasta met dagiti magmagna a tao kadagiti bangketa.

Innayon ti mayora a masapul a kanayon a nadalus ti bangketa a pagnaan dagiti tao ken awan ti makadisgrasia nga ania man a madalapusda.

Kinuna ni Medina a sumagmamano nga aldaw sakbay ti Paskua, nagdudupudop dagiti bisita iti siudad gapu iti kabarbaro nga estadona. Napunno kadagiti dadakkel a lugan dagiti kalye iti aglawlaw dagiti hotel ken restaurants, isu a nabuntog ti trapiko. Ti Kalye Mena Crisologo iti Heritage Village ket kasla malapunos iti turista. Gapu kadaytoy, narigatan dagiti agindeg, trabahador ti siudad ken bisita a magna kadagiti kalye.

Tapno naannayas ti pannagna ti trapiko gutgutugoten ti gobierno ti siudad ti panagtitinnulong dagiti agindeg tapno lumawag, luminis dagiti kalye ken bangketa.

“Ti reglamento nga awan agparking iti Kalye Quezon ket masapul nga istrikto a matungpal. Nakipet ken adu ti lugan ditoy nga aggapu iti sango ti Kapitolio ken tengnga a dike a no sadino ket ditoy nga aggapu ken aggawid dagiti lugan manipud Manila, Laoag City ken dadduma nga ili ti probinsia. Ti akinlaud a dike ket siririkep ta madama ti pannakaaramid ti rangtay,” kinuna ni Medina.

Kinuna ti mayora a maisagsaganan ti pannakaipatakder iti daan a tiendaan ti maysa a pasdek nga addaan iti multi-level parking area a manamnama a mangkissay iti problema ti trapiko iti siudad. Kasta met nga itrabtrabaho ti city council ti pannakaipasdek ti linteg ti siudad a mangted iti bileg kadagiti opisial ti trapiko tapno istrikto a maipatungpalda dagiti linteg ti kalsada.

Kabayatanna, impalubos ti Arkidiosesis ti Nueva Segovia ti panaglako dagiti adda puestoda iti aglawlaw ti Plaza Salcedo iti asideg ti Palacio Arsobispado aglalo ti oras ti panagandar ti ‘dancing fountain’ a kaadu dagiti tao nga agbuya tapno dumalus ti aglawlaw ti plasa ken awan ti makaatipa iti nasayud a pannagna dagiti lugan.

Maysa pay a plano ti gobierno ti siudad a mangpabassit iti problema ti trapiko ti panamagbalin dagiti bakante a lote iti sentro ti siudad a pagparkingan kas ti adda iti sango ti Crisologo Museum.

Mamati ni Medina a makatulong ti panagkikinnamayyet dagiti Bigueños, gobierno ken pribado a sector ken dagiti bisita ti siudad iti pannakamentener ti estado ti Vigan a kas New 7 Wonders Cities.#