Mayor, mangnamnama nga agbalin a siudad ti Narvacan

NARVACAN, Ilocos Sur – Dakkel ti namnama ti mayor ditoy nga agbalin a siudad daytoy nga ili iti mabiit iti baet nga adda isusupring ti liga dagiti siudad a manayon ti bilang dagiti agbalin a siudad iti pagilian.

Kinuna ni Mayor Edgar Zaragoza a makapasa ti Narvacan iti populasion ken ti land area ken manamnama a maragpatna ti kasapulan nga income a P100 milion iti panaglukat ti commercial complex a mabangbangon iti daytoy nga ili.

Kinuna ti mayor a disadvantage ti aplikasion ti Narvacan nga agbalin a siudad ti kaaddan ti dua a suidad iti probinsia ngem impaganetgetna a saan a lapped daytoy ti panagbalin ti ilina a siudad agsipud ta maragpatna met dagiti requirements.

Nagbalin a siudad ti Vigan ken ti Candon idi 2001.

Dinakamat ni Zaragoza ti panangkuestion ti League of Cities ti panangaprobar ti Kongreso iti panagbalin a siudad ti 16 nga ili agsipud iti manamnama nga ibabassit ti awatenda nga internal revenue  allotment gapu iti yaadu ti bilang dagiti siudad iti pagilian.

Kabayatanna, indatag ni Zaragoza iti tallo nga aldaw a Tactical Planning Workshop – Conference ti Regional Development Council,  Region I a naangay iti Fort Ilokandia Resort iti Laoag City idi Abril 14-16 ti pannakaituloy dagiti nadumaduma a proyekto iti probinsia kas iti pannaka-upgrade ken pannakapasayaat ti Vigan airport, pannakaituloy ti Banaoang Irrigation Pump Project, Phase I ken ti pannakaestablisar ti Phase II, pannakaipasdek ti by-pass road iti Candon City, Santa sea wall, pannakakalsada ti Cabugao-Nueva Era-Danglas road, Narvacan Sulvec Port, Santa port ken dagiti nadumaduma nga irrigation projects.

Timmabuno ni Zaragoza iti nasao a miting kas mangidaulo ti liga dagiti munisipalidad iti probinsia. (Nemia Icari/Jane Ballad)