Mayor, nakaawat iti death threat

SANTA, Ilocos Sur – Maysa a fire officer ti naggapuan ti ballaag iti biag ti mayor ditoy nga ili?

Daytoy ti mapapati a lumlumtuad iti insayangkat ni Mayor Jeremy Jesus Bueno III y De Peralta, 33, a bukodna a panagimbestiga mainaig iti naawatna a text message a nangballaag iti biagna.

Mismo nga inreport ni Bueno iti police station ditoy idi agarup 3:30 ti malem ti Hunio 14 nga idi makariing iti agarup alas dose ti tengnga ti rabii ti Hunio 14, binasana dagiti naawatna a text messages ket maysa a mensahe manipud iti cellphone number 0917-244-8596 a naipatulod kenkuana idi 11:40 ti rabii ti Hunio 13 ti nangballaag iti biagna.

Daytoy ti linaon ti ballaag a naawat ni Bueno: “Tangina mo mayor kung merun lang nangyari sa asawa at anak ko kanina papatayin rin kitang putang ina mo”.

Segun iti mayor, tinawaganna ti nadakamat a numero ngem awan ti simmungbat kenkuana.

Kinuna ni Bueno a nangisayangkat iti bukodna a panagimbestiga ket naammuanna nga adda insidente a maysa a demotor a bilog ti nalned iti nadadael a rangtay iti Barangay Calungboyan, Santa idi Hunio 13.

Babaen ti bukodna a panagimbestiga, naduktalan ni Bueno a maysa a Fire Officer Errol Aquino, residente iti Barangay Casiber, Santa ti akinkukua iti numero ti selpon a naggapuan iti ballaag.

Kinuna ti mayor a babaen daytoy nga impormasion, impapanna nga isu ti pabasolen ti nagipatulod iti text message gapu iti saan a nasimpa a rangtay.

Saan a nailanad iti blotter no karaman ti asawa ken anak ni Aquino a naglugan iti bilog idi nalned.

Iti pannakaisurat daytoy, naiyendorson iti opisina ti provincial prosecutor, Vigan City, ti kaso a light threat maikontra ken ni FO3 Aquino.#