Mayor, napili a 2012 Model OFW Family of the Year

STA. CATALINA, Ilocos Sur – Napadayawan ti pamilia ti mayor ditoy nga ili a Model OFW Family of the Year (MOFYA) iti seremonia a naangay iti Hotel Sofitel, CCP Complex, Pasay City idi Disiembre 5, 2012.

Napili ni Engr. Carlos R. Asuncion ken ti pamiliana nga awardee iti national level ti 2012 MOFYA iti land-based category idinto a ni Capt. Manuel D. Gabornes ken ti pamiliana iti sea-based category.

Imbalat ni Asuncion, agdama a mayor ditoy nga ili, dagiti 34 a kinabalubalna a regional winners iti panangiyalatna iti pammadayaw a MOFYA.

Napili ni Asuncion a kas MOFYA 2012 gapu iti pagwadan a pamilia a binangonna,  panagballigina iti negosiona ken pannakainbolbarna iti panagdur-as ti komunidad wenno sibiko ken iti lideratona.

Kinuna ni DOLE Secretary Rosalina D. Baldoz a dakkelen a dayaw ti pannakapili ti maysa nga OFW a winner iti regional level gapu iti kinangato iti standard ti Board of Judges iti panagpilida.

Segun ken ni Asuncion, itedna ti gunggonana a tulongna kadagiti nadidigra iti Bagyo Pablo iti Mindanao ken para iti programana ti scholarship.#