Mayor, naragsakan iti desision ti Korte Suprema a maisubli ti Batac a siudad

BATAC, Ilocos Norte – Kinuna ti mayor ditoy a maragsakan iti desision ti Korte Suprema a nangpabor iti mosionda a maisublida a kas siudad.

Iti maysa a report manipud iti Bombo Radyo, naammuan a daytoy ti reaksion ni Mayor Jeffrey Nalupta iti impaulog ti Korte Suprema a desisionna a nangpabor iti mosion for reconsideration nga impilada mainaig iti immuna a panangpabor ti Nangato a Korte iti petision ti League of Cities of the Philippines a nangideklara a saan a konstitusional ti cityhood laws a nakaibatayan ti panagbalin a siudad dagiti 16 nga ili nadumaduma a paset ti pagilian a pakairamanan ti Batac, Ilocos Norte.

Malaksid ti Batac, maisubli manen a siudad ti Borongan, Eastern Samar, Baybay, Leyte; Bogo, Carcar, ken Naga, agpapada nga adda iti probinsia ti Cebu; Catbalogan, Samar; Tandag, Surigao del Sur; Tayabas, Quezon; Lamitan, Basilan; Tabuk, Kalinga; Bayugan, Agusan del Sur; Mati, Davao Oriental; Guihulngan, Negros Oriental; Cabadbaran, Agusan del Norte; ken El Salvador, Misamis Oriental.

Ngem segun ken ni Presidente ti League of Cities of the Philippines ken Mandaluyong Mayor Ben Hur Abalos, mangipilada iti mosion para rekonsiderasion iti daytoy a pangngeddeng ti Korte Suprema.

Idi Nobiembre 18, 2008, indeklara ti Korte Suprema babaen ti butos a 6-5 a saan a konstitusional ti cityhood laws gapu ta adda dagiti probiso daytoy a nang-exempt kadagiti maseknan a munisipalidad iti minimum requirement iti pamastrekan, populasion ken land area.

Sagudayen ti RA 9009 a masapul a matun-oyan dagiti local government units nga agngayangay para iti kinasiudad dagiti criteria a pakairamanan ti land area a 100 kilometers, 150,000 a populasion ken naingato ti pamastrekan manipud iti P20 milion iti P100 million .

Iti petision ti League of Cities of the Philippines a nangsupiatanda iti panagbalin dagiti 16 a munisipalidad a siudad, kinunana a saan a natun-oyan dagitoy ti P100 milion income requirement.

Idi Mayo 21, 2009, indeklara ti Korte Suprema a “final and executory” ti pannakawaswas ti cityhood laws ket idi Hunio 2, 2009, sinerraannan a pinal daytoy babaen ti en banc resolution ti kaso ti cityhood laws.

Ngem idi Disiembre 21 iti daytoy met laeng a tawen, babaen ti butos a 6-4, binaliktad ti Korte Suprema ti desisionna ket indeklarana a konstitusional ti cityhood laws a nangkonbert kadagiti 16 a munisipalidad a siudad.

Kinuna ni Nalupta a babaen daytoy a pangngeddeng ti Korte Suprema, maituloydan dagiti rinugianda a programa ken proyekto ti siudad sakbay a naibabawi ti kinasiudadda.

Sagudayen ti Local Government Code ti 1991 a 40% iti nasional a koleksion iti buis ti maited kadagiti local government units ket 23% porsiento iti daytoy ti pagbibingayan dagiti siudad.

Iti daytoy a pangngeddeng ti Korte Suprema, kinuna ti LCP a maapektaran ti budget dagiti daan a siudad a nakailatangan dagiti pondo para kadagiti programa, proyekto ti gobierno dagitoy a siudad.#