Mayor, natambang iti kaaldawan ti Paskua

MT. PROVINCE – Binuangay ti polis ditoy ti maysa a task force a mangimbestigar iti pannakapapatay ti mayor ti Paracelis ditoy a probinsia  iti kaaldawan ti Paskua.

Binuangay ti polis ditoy ti Task Force Mayor Rafael para iti nadaras a pannakasolbar ti pannakapapatay ni Paracelis Mayor Cesar Rafael iti agarup ala una ti malem ti Dec. 25.

Kagapgapu ni Rafael iti maysa a pasken dagiti kakabagianna iti Sitio Sinaktib ket daldaliasaten ti luganna ti Barangay Palitod idi pinaratupot dagiti armado a lallaki a puon ti nakatayanna.

Kinuna ni Cordillera Police Director Chief Supt. Eugene Martin a kitkitaenda ti politika, riri iti daga ken iti posible a pannakainbolbar ti New People’s Army iti pannakapapatay ni Rafael.

Segun iti polis, aganay 60 a bala ti naiputok iti lugan ti mayor ket maibasar iti inisial nga inbestigasionda, mapapati a pinennek dagiti nagtambang a magudasda ni Rafael.

Kanaig daytoy, dinawat ni Mt. Province Gov. Maximo Dalog iti polis ti nainget a panagimbestigada para iti madagdagus a pannakasolbar ti pammapatay.

Segun iti gobernador, iti report a dimmanon kenkuana, saan a nakurkurang ngem lima a tattao ti nagisayangkat iti krimen.

Imbilin ni Mt. Province Police Director Supt. Joseph Adnol ti pannakasolbar a dagus ti pammapatay idinto nga innayonna a daytoy ti umuna a pannakapapatay ti maysa a politiko iti probinsia iti pay met kaaldawan ti Paskua.

Itay laeng nabiit, nabutosan ni Rafael a presidente ti Mayors’ League iti Mt. Province.

Adu a residente ditoy ti nasdaaw iti pannakatambang ni Rafael iti Barangay Palitod agsipud ta baluartena daytoy a barangay.#