Mayor ti Vigan City, imbilinna ti panangisubli dagiti meat vendors iti dati a presio ti karne ti bab

VIGAN CITY – Iti sanguanan ti ballaag ti mayora ti siudad a saandan nga aglako no saanda nga isubli iti dati a presio ti lakoda a karne ti baboy, timmulok met laeng dagiti meat vendors ket insublida iti P150 ti presio ti baboy iti tiendaan publiko ditoy.

Kanaig daytoy, imbilin ni Mayor Eva Marie S. Medina ken ni Market Master Bonifacio Corpuz ken dagiti paratiket iti tiendaan publiko ditoy ti panangmonitorda no tungtungpalen met laeng dagiti meat vendors nga isublida ti presio ti karne ti baboy iti P150 kada kilo.

Kinuna ni Medina a masapul a takderan dagiti meat vendors  ti saoda kenkuana a mangisubli ti presio ti lakoda a karne ti baboy iti P150 kada kilo apaman nga ikkaten ti gobierno probinsial ti quarantine fee a maipakpakat kadagiti baboy a maiserrek iti probinsia.

Idi Marso 28, kiniddaw dagiti aglaklako iti karne a maipangato ti presio ti karne ti baboy gapu iti P200 a quarantine fee a singiren ti gobierno probinsial kadagiti maibibiahe a baboy a sumrek iti probinsia.

Kinuna ni Medina a sakbay a napan nakidialogo dagiti meat vendors ken ni Gov. Deogracias Victor Savellano, nagmimitingda nga immuna ket impalagipna kadakuada ti sinaoda kenkuana nga apaman a mai-lift ti quarantine fee idiay Tagudin, isublida ti presioda a P150.

“Ngem idi nagsasangodan ken ni Apo Gobernador, saanda a tinakderan ti sinaoda,” kinuna ti mayora.

Kinuna ti mayora nga ita a kalgaw, kaadu dagiti sangaili ken turista ket dimmakkel ti maparti a baboy para iti langgonisa ken bagnet ket “saan a kasdiay kadaras ti agbirok iti kasdiay kaadu a baboy, isu a datayo (laeng) ditoy Vigan ti agal-ala iti ruar ti Vigan.”

Kinuna ni Medina nga impettengna iti presidente dagiti meat vendors iti siudad a ‘masapul nga isubliyo (presio ti baboy) ta no ania ti naisaoyo, masapul a takderanyo.”

Idi bulan ti Pebrero, kellaat nga impangato dagiti meat vendors ti presio ti lakoda a karne ti baboy iti P150 idinto nga awan pay ti pammalubos manipud iti Sangguniang Panlungsod.

Insubli met laeng dagiti aglaklako ti presio iti P140 kalpasan nga imballaag ti konseho ti Vigan a posible a makasuanda iti panaglabsing iti linteg gapu iti panangingatoda lattan ti presio ti lakoda a karne ti baboy idinto nga ad-adalen pay laeng ti konseho ti petisionda.

Napalubosan met laeng dagiti meat vendors a mangingato iti presio karne ti baboy iti P150 kalpasan ti miting nga inangay ti opisina ti ehekutibo ken nakipartisiparan dagiti meat vendors, hog raisers, dagiti maseknan nga opisina ti siudad.

Napagtitinongan iti nasao a miting dagiti sumaganad a presio ti liveweight a baboy: P100 kilos  ken agpangato- P95.00, 90-99 kilos – P93.00, 80-89 kilos – P91.00, 70-79 kilos – P89.00.

Dagiti takong: Class A- P80.00 ken Class B – P70.00.

Idi masaludsod ken ni Medina no adu met la ti nagparti kalpasan ti pammilinna a maisubli iti P150 ti presio ti karne ti baboy, insungbat ti mayora nga agpartida latta, ta “imposible a daydiay negosioda, pagsardengenda iti maysa nga aldaw.”

“Isu nga amin a consumers iti Vigan, no adda aglako iti nangatngato ngem P150, masapul nga ipakaammoyo kada Bonnie Corpuz wenno asinoman nga empleado ti city hall tapno maaramidtayo ti dapat lang wenno rumbeng nga aramiden,” kinuna ti mayor.”