Mayor ti Vigan, nagtignay a mangsaluad iti industria ti longganisa, bagnet

VIGAN CITY- Nagtignay ti mayor ditoy siudad tapno masaluadan ti industria ti longganisa ken bagnet iti sanguanan ti pannakakumpiska dagiti karne ti baboy a naipuslit a mailako iti tiendaan publiko ditoy siudad idi Disiembre 2.

“Ipangpangrunatayo a bantayan dayta a banag agsipud ta dayta metten ti pakadadaelan ti industriatayo ti longganisa ken bagnet,” kinuna ni Medina.

Kinuna ti mayora nga adu nga agnaed iti siudad ti mabenbenepisiaran iti nasao nga industria ket maapektaran la ketdi ti panagbiagda no saan a masaluadan daytoy.

Kinuna ni Mayor Eva Marie S. Medina a kapatangna ti vice mayor tapno mangiwayatda iti wagas a pangsalaknib iti produkto a longganisa ken bagnet.

Innayon ti mayora a no makitana a nabuntog ti pannakaaramid iti ordinansa, mangipaulog iti executive order para iti daytoy tapno saan a madadael ti industria ti longganisa ken bagnet ti siudad.

“Paad-adalko kadagiti abogadotayo no ania ti maipalaon iti executive order para iti pannakasaluad ti industriatayo,” kinuna ni Medina.

Impalgak ti mayora nga addan dagiti damag a dimmanon kenkuana mainaig iti maipuspuslit a karne iti tiendaan ket nagiwayatda iti panagsiput ngem nagaksion a daras idi nakaawatda iti text message mainaig iti daytoy.

Nangisayangkat iti operasion dagiti city officials nga indauluan ni Medina ken ti agriculture office iti panangidaulo ni City veterinarian Liborio Arca ket kinumpiskada dagiti frozen a karne ken laplapayag a mailaklako iti tiendaan kalpasan nga awan ti naipakita dagiti agassawa nga Aristotle ken Evangeline Osalvo a dokumento a nangted pammalubos kadakuada a mangiserrek kadagitoy a tagilako iti tiendaan publiko.

Mapapati a naggapu pay dagiti tagilako manipud iti ballasiw-taaw.

Kinuna ni Medina nga adda napartuat nga ordinansa ti siudad a masapul a maparti amin iti slaughterhouse dagiti mailako a karne ti baboy iti tiendaan idinto a linagidawna no kasano a naipuslit dagiti na-chop-chop a karne iti Ilocos Sur idinto nga adda met quarantine checkpoint iti Tagudin.

Linagidaw pay ti mayora dagiti damag nga adda dagiti napalusot a kargamento iti checkpoint ti probinsia iti Tagudin agsipud ta mapapati nga adda panagpasuksok kadagiti agbambantay iti quarantine.

Kinuna ni Medina a bihilanteda nga agtuturay agsipud ta adu a tattao ti nakasanggir iti industria ti longganisa ken bagnet ket no madadael daytoy, adu ti mapukawan iti pagsapulan, adu nga annak ti saan a makapagbasa ken saan a nasayaat ti panagbiagda.

Dinayaw ni Medina ti pannakitinnulong ti komunidad, kas iti di nagpabigbig a nangiteks kenkuana iti naipuslit a tagilako iti tiendaan publiko idinto nga inggunamgunamna kadagiti umili a no adda makitada a madi nga aramid, “dapat laeng nga ipakaammoda kadagiti otoridad tapno maibideran daytoy a banag tapno masaluadan, saan laeng dagiti residente ditoy siudad no di pay dagiti turista”.

Ti Vigan longganisa ken bagnet ti paborito a gatgatangen dagiti turista nga umay agpasiar ditoy siudad gapu iti naisalsalumina a ramanna a maigidiat kadagiti umarngi a produkto dagiti sabali a probinsia wenno siudad.#