Mayor, tumulong iti pannakatunton ti hustisia iti napapatay nga OFW

TAGUDIN, Ilocos Sur – Mismo a ti mayor daytoy nga ili ti agturong iti Singapore tapno tumulong iti pannakatunton ti hustisia ti overseas Filipino worker a nasukalan a natay a kadua ti maysa a Bangladeshi national iti maysa nga otel iti nasao a pagilian.

Kangrunaan a panggep ni Mayor Roque “Jun” Versoza ti panangalana iti police report mainaig iti mapapati a pannakapapatay ni Rezzilyn Lodia Vinegas, 33, Filipina maid, ken residente iti Barangay Salvacion, ditoy nga ili, iti Summer Hotel a masarakan iti Geylang Lorong 22, kaduana ni Mohammad Sumon Lutfar, Bangladeshi national a maibagbaga a boy friendna.

Segun iti report, nagtsek-in dagiti dua iti nasao nga otel iti alas 6:00 pm ket inupaanda ti kuarto iti lima nga oras.

Idi saan a nagtsek-out dagitoy idi pasado alas 11:00 ti rabii, tinawagan ida ti receptionist tapno palagipanna ida a naungpoten ti panaggianda iti kuarto ngem awan ti simmungbat.

Nagturong ti receptionist iti kuarto sa nagtugtog ket idi awan ti simmungbat, linuktanna ti ridaw babaen ti master key ti otel.

Nakita laengen ti receptionist ti Filipina a daradara iti katre idinto a nakailad ti Bangladeshi national iti suelo ti pagdigosan.

Nagsagrap dagiti dua kadagiti sugat iti bagida. Nasarakan ti maysa nga imuko nga agtiddog iti 5cm iti nakapasamakan ti krimen.

Segun iti report, awan ti nangeg dagiti kliente a nangukopar iti agsumbangir a kuarto a suspetsoso a napasamak.

Iti pannakiuman kenkuana ti media, kinuna ni Verzosa a kas maibatay iti inisial a damag manipud iti embahada ti Pilipinas iti Singapore ken Department of Foreign Affairs iti San Fernando City, mapapati a binagbagsol ti Bangladeshi national ni Vinegas sana binagsol ti bagina.

Kabayatanna, dupudop dagiti tattao a napan nakipagrikna ken ni Vinegas bayat ti pannakaimassayagna iti Barangay Salvacion, ditoy nga ili.

Manipud iti Manila International Airport, deretso a naibiahe iti Ilocos Sur ti bangkay ti OFW ket simmangpet ditoy idi bigat ti Marso 9.#