Mayor, Vice Mayor ti Vigan City, awan kasangoda iti May 2013 elections

VIGAN CITY – Kas ninamnama, awan ti nakaitured nga agkandidato a sumango kada incumbent Vigan City Mayor Eva Marie S. Medina ken Vice Mayor Lourdes Baquiran iti eleksion inton Mayo 2013.

Ngem kinuna ni Mayor Eva nga iti baet nga awan ti kasangoda ken ni Vice Mayor Baquiran, ikampaniana latta dagiti kandidatona para iti agtultuloy a nasayud nga implementasion dagiti programa ken proyektona.

Kabayatanna, awan met ti kasango ni incumbent Caoayan Mayor Germelina Singson-Goulart iti lokal nga eleksion inton 2013.

Nupay kasta, adda kasango ni Konsehal Pedro Belarmino a katiket ni Mayor Goulart agsipud ta nagipila ni dati a Mayor Mario Tugade iti kandidaturana para bise mayor.

Iti met biang ni Mayor Goulart, impatalgedna ti panangsuportana iti katiketna para iti napinpintas a panagkinnamayet ti lehislatibo ken ti ehekutibo sana dinakamat ti nasayaat a panagkaduada ken ni Vice Mayor Gemma Padaong a saanen nga agkandidato pay agsipud ta maungpotnan ti tallo a terminona.

Iti Vigan City, uppat met dagiti konsehal ti agturpos gapu ta maungpotdan ti nagsasaganad a tallo a terminoda ngem agpailayon iti babaen ti Bileg Party a partido ni Mayor Eva dagiti incumbent a councilors a pakaibilangan da Konsehal George Villanueva, Konsehal Benjo Versoza, Konsehal Constante Benzon, Konsehal Janina Carine Medina-Fariñas, Konsehal Kristen Tenten Figuerres ken ABC Pres. John Patrick Singson.

Iti eleksion idi 2010, ni laeng Benzon ken ni dati a Vice Mayor Franz Ranches, Jr. ti limsot a saan a nailinia iti tiket ni Mayor Medina.

Saanen a naungpot ni Ranches ti terminona ta dinutokan ni Pres. Benigno Aquino III a Northern Luzon Coordinator ti National Anti-Poverty Commission. Nupay kasta, ti anakna a ni Francisco Arturo Ranches III ti nangsukat kenkuana.

Impila ni Ranches III ti sertipiko ti kandidaturana para konsehal ditoy siudad iti babaen ti Liberal Party idinto a maysa a dati a mediaman, ni Julius Caesar Arce, ket agkandidato para konsehal iti babaen ti Nationalist People’s Coalition.

Karaman pay a nairaman iti tiket ni Mayor Eva ni Dr. Kristen Tenten Figuerres a  simmukat met iti puesto ti amana a masaksakit.

Ituloy met ni Konsehal Janina Carine Medina-Fariñas dagiti programa ken gannuatna babaen ti panagpailayonna.

Madakamat a naipuesto ni Konsehal Fariñas iti sangguniang panlungsod kalpasan a nagbakante ti puesto ti konsehal maigapu iti panagkandidato idi ni Vice Mayor Ryan Singson para iti kinadiputado iti umuna a distrito ti probinsia a nagbakante gapu iti pannakasentensia ni dati a Congressman Ronald Singson iti maysa a korte iti HongKong gapu iti panagikutna iti droga.

Iti panagbakante ti puesto ti bise mayor, nagpangato ni   No. 1 Councilor Lourdes Baquiran ket nagbakante ti maysa a puesto ti konsehal.#