Maysa a Paskua iti Biag ni Maestro Rilo

Sarita ni Jobert M. Pacnis
(Maikadua a paset)
Kaadalanna iti hayskul ni Relly. Agabayda iti tugaw iti likud a dumna iti divan. Kanayon a daytoy ti mangted iti papelna no maibusan. Iti kinadekketda, napuotan laengen ni Rilo ti bagina nga agtamed iti kaklasena.

Indalan ni Rilo ti riknana babaen ti inlibas a love letter nga impaspasigpitna iti notebook ni Relly. Ngem awan ti naurayna a sungbat ni Relly. Naalana ti nagbain ta kaskasdi latta ti pannakilangen daytoy kenkuana. Kasla awan aniamanna dagiti surat nga inar-aramidna. Linen a papel pay dagidi inusarna. Inyurnonganna manipud iti bassit-usit a balonna iti inaldaw tapno makagatang laeng iti “nabanglo a papel.”

Nasaktan ni Rilo ta kasla di ikankano ni Relly dagiti nagsasaruno a suratna. Christmas party-da daydi. Inangayna amin a riknana ket kinasaritana ti kaklasena.

“Komusta ti ibagbagak?” arig-paarasaas a saludsodna ken ni Relly. Madama ti programada iti room-da ket agab-abayda latta iti likud. Awan unay ti arindenggen ta nakamikropono ti adbayserda.

Kinita laeng ni Relly a siisem. Manuktukod ti ikikitana.

Naabak iti pinnerrengda.

“Rilo, ubingta pay kadayta a banag,” arig-paarasaas met laeng a sungbat ni Relly idi agangay. “Agadalta koma pay.”

Daydin ti nagtungedan ti panagsursurat ni Rilo iti linen paper. Ngem saan latta a nagsardeng a nangiparparipirip iti ayatna iti kaklasena. Nagbalin a liwliwana idi ti nagputar kadagiti dandaniw. Naibasa dagitoy iti DWPE idiay Tuguegarao (siudad itan). Kadawyan a maisagut ken ni Relly dagiti dandaniwna.

Ti ammona, magun-odna met laeng ti nasam-it a “wen” ni Relly idi nagbalinda nga “instant celebrities” iti Ballesteros National High School nga eskuelada. Kaaduanna idi ti dumdumngeg iti Kumpletos Rekados a programa iti radio a pagip-ipatulodanna kadagiti daniwna.

Ngem nadlaw ni Rilo nga awan ti namalbaliwan ni Relly kenkuana. No kasano ti pannakilangen daytoy sakbay nga impaduyakyakna ti riknana, kasdiay latta uray namin-anon a dinaniwanna iti tangatang.

No kasta nga irengreng idi ni Rilo ti marikriknana, ti la ar-aramiden ni Relly tapno makaliklik laeng.\

“Ubingta pay,” sangkakunana met no saanen a makaliklik. “Agbasata pay, klasmeyt,” itapikna pay.

Ket nagsina ti dalan da Rilo ken Relly idi agkolehiodan nga awan ti nabukel a relasionda. Iti Tuguegarao (di pay a siudad idi) a nagenrol iti Computer Science ni Relly idinto a nabati iti ilida a nangalaanna iti Edukasion.

Intuloy latta ni Rilo ti nagdaniw iti radio. Uray agaddayodan ken ni Relly, kaskasdi a di nagsardeng ti panangdaniwna kadaytoy. Dumegdegdeg ti marikriknana nga ayat iti kaklasena. Sinuratanna pay ti balasang. Ngem awan ti naawatna uray maysa laeng a sungbat daytoy.

Saan met a patien ni Rilo a di nakadanon dagiti suratna iti balasang. Inlanadna ti departamento daytoy. Kas kuna dagiti kaarrubana nga agbasbasa met iti pagadalan ni Relly, adda bulletin board ti kada departamento a pakailanlanadan ti estudiante nga adda suratna.

Kalpasan ti lima bulan sinursuratan ni Rilo ti pagrukbabanna, inkeddengna nga isardengnan ti ar-aramidenna. Ipamaysana laengen ti agbasa.

Ngem isu met ti pannakaawatna iti surat ti balasang. Bakasion ti Paskua 1996 idi.

Ammok, Rilo, adda pannakaguram kaniak, kinuna ti maysa a paset ti surat, iti diak panagsubsubalit. Ngem maawatannak koma. Kayatko a leppasen nga umuna ti panagadalko. Sa maysa, ubingta pay… adu pay ti mabalin a mapasamak.

Ubingta pay, addayta manen ti saanen a namnaminsan a nangngegna a rason ti ay-ayatenna. Apay, no makirelasion, kayatna kadin a sawen a madadael dagiti arapaapna?

No talaga a naikarita a para iti maysanmaysa, pagtugmokento latta ti panawen dagiti lubongta.

Study hard…

Malagip ita ni Maestro Rilo dayta a surat ni Relly kenkuana. Nupay kaskasano, naikkan idi ti namnama. Tapno saan unay a maila, binay-anna ti plumana a nagampayag iti tangatang. Ket ni latta Relly ti inspirasion dagiti daniwna.

Ngem idi addan iti maikatlo a tukad ti Edukasion, nadamagna a nagbakasion ni Relly. Disiembre 17, 1998, malagipna la unay. Pinanggepna a sarungkaran ti balasang. Ngem dina met laeng pinatuloy. Naammuanna a kadua daytoy a simmangpet ti ama ti imetna a sikog.

Daydi ngatan ti kalidayan a Paskua ken ni Maestro Rilo. Ubingta pay? kinunkunana. Ngem ania daytoy nga inaramidmo, Relly? sinaludsodna iti bagina.

Sipud idin, saannan a kayat ti rummuar. Kalpasan ti klasena, a nagbabaan dagiti markana, agawid a dagus ket nagpuppupok iti kuartona. Impamaysana ti nagputar iti daniw— daniw ti saem, ti panaas, ti limdo, ti liday, ti sugat, ti ut-ot… ken panangay-ay iti bukod a bagi.

Pagyamananna, naileppasna met laeng ti Edukasion. Nakaruar a dagus iti licensure exam. Dua a tawen sakbay a nagbalin a regular.

Ni Relly? Innala kano ni lakayna idiay ilida (a dinan inammo no sadino).

NGEM idi laeng kalman a pannakiplasa ni Maestro Rilo iti pannakabagina iti Christmas party-da iti room-na, nagkitada ken ni Relly– saanna a ninamnama a panagkita. Nasabetna daytoy iti fish section ti ilida. Nupay iti kabangibang nga ilida ti nakaalaanna iti item-na, minalem nga agawid iti ilida ta agarup duapulo minuto met laeng a tarayen ti motorna.

“Relly?” di ammo ni Maestro Rilo no siddaaw wenno iliw ti nariknana kadayta a kanito.

“Rilo?” madlaw a naklaat met ni Relly a nakakita kenkuana.

Nagkinnomustada. Pinalabasda ti agarup maysa nga oras iti Lilong Sabas Panciteria. Adu ti nagsarsaritaanda.

Naammuan ni Maestro Rilo a kagapgapu ni Relly idiay Singapore kas domestic helper. Namin-adu gayam a nagpatagabo iti ganggannaet tapno laeng maisakadna ti panagbiagda nga agina. Awan kano pay ti makatawen a nagdennada iti nakasikog kenkuana idi agsinada. Pinanawan lattan ti ama ti anakna a kasla awan aniamanna.

(Maigibusto)