Maysa a Paskua iti Biag ni Maestro Rilo

Sarita ni Jobert M. Pacnis
(Umuna a paset)

ITI pannakatimud ni Maestro Rilo iti Give Love On Christmas Day iti CD player-da, panagriknana, adda nakulding a nginabras ti kinataona. Napaanges pay iti nauneg kabayatan ti panangibutonesna iti maris-dapo nga unipormena iti dayta nga aldaw.

Iti baro a lubong ni Maestro Rilo tapno mulienna dagiti ubbing iti pagadalan, makarikna la unay iti pannakaikawa. Dina ninamnama a ditoy pay kabangibangda nga ili ti nakaipuruakanna a no sadino, sabali dagiti ubbing a nadanonna. Saanda nga Ilokano a kas kenkuana. Ibanagda, ngem maawatanda ti Ilokano.

Ti kanta, italtalukatikna ti rumbeng laeng nga imeten ti kas ken ni Maestro Rilo. Ayat, ayat, ken ayatto latta. Iti panangmuli kadagiti ubbing, saan a mabalin nga ikkaten dayta a banag kenkuana. Kaludon daytoy ti kinaatiddog ti pasensia.

Sabali itan ti panawen. Saanen a maal-ala dagiti ubbing iti kusilap, kas idi panawen da apong Lakay ken Apong Baket, no kayat a pagtalnaen ida. Adun kadakuada ti makipinnerreng, ken agsao, sumungbat nga awan ti panangipirpiritna iti mannursurona.

No nangednged ti pasensia, ken awan anus, saan a bagay kenka ti agbalin a mannursuro, dayta ti sangkakuna ni Maestro Rilo iti bagina no ngannganin maiburuang ti riknana. Naimbag ketdi ta inkakaubinganna ti managpasensia.

Isu ngata a naiturong iti kinamannursuro ti desdes a tinaluntonna? Ta saan man met nga Edukasion ti damo a kursona. Electronics and Communications Engineering ti inleppasna. Ngem gapu iti kimpet a sagubanit idi agsapsapulen iti panggedan idiay Manila, nagawid ta di kabaelan ti bagina ti sobra a polusion iti siudad.

Naileppasna daytoy agingga a nabalinanna ti nangala iti licensure examinations. Ket maysa kadagiti 28% a dagup dagiti nakapasa kadagidi a panawen. Dita a nangrugi ti panangarakupna iti nasao a propesion. Timmayaben iti utekna ti kinainhinierona.

Iti damo a tawen ni Maestro Rilo iti Cabaybay National High School, aklonenna, kasla kayatna idin ti sumuko. Nairana kenkuana ti seksion ti Grade 9 a kalolokuan ket ngatan iti panagriknana. No idiligna ida iti nagtaudanna a pribado a pagadalan, amang a natustuso dagiti nadanonanna. Gapu ngata ta Ibanagda ket maysa laeng nga Ilokano a naipullasit iti ilida?

Ngem di simmuko ni Maestro Rilo. Inan-anusanna nga inwardas dagidi nga ubbingna. Unget ‘di nalpas nga unget, no kasta a dina malapdan ti bagina

“Bambannogmo laeng no kanayon nga agpungtotka kadakuada, sir. Agka-high-blood-ka pay,” impatigmaan idi ni Ma’am Dianne kenkuana. “Kastadan sipud Grade 7-da.”

“Nalabesda ngaminen, ma’am,” kinunana. Abusta nagsadutda nga agdalus, naglaingda pay nga agdadael kadagiti ramitda iti uneg: pagbasuraan, baldi, sagad, lampaso ken pagakup. Agkarabettak pay ti paso dagiti mulada. Dagiti donasion nga electric fan, saan pay a nabulanan, nadadaeldan. Kasano, pulinglingenda latta uray naka-stationary mode.

Ngem napaneknekan ni Maestro Rilo nga awan nga agpaypayso ti mamaay ti panagpungpungtotna. Saan a dumdumngeg dagiti adalanna. Kasla inyad-adda pay ketdi ti nagbalin a “pasaway.” Dakami, aya, ti agsakit ti karabukobna, kasla kunkunada pay ketdi.

Binaliwan ni Maestro Rilo ti estratehiana. Nagbalin a naamo kadagiti adalanna. Saanen a managpupungtot. Maminsan laengen nga agsao. No saanda nga agtungpal, isun a mismo ti agkuti. Agsibog, agsagad iti aglawlawda ken ag-floor wax pay.

No kunada a respect begets respect; love begets love ti impakat ni Maestro Rilo. Nupay dayta a love, iti sabali a pannao, sangkaarapaapna iti inaldaw a masarakanna koman.

“Umayen dagiti mayat ta agdalustayo,” kinunkunana iti uneg ti kuarto kabayatan ti panangalana kadagiti masapul a sagad ken pagakup.

Idi damo, dua wenno tallo laeng a babbai nga adalanna ti agdisnudo a tumulong kenkuana. Saannan a makita ti likudan dagiti dadduma apaman a mapatit ti kampana a panagpatingga ti maudi a klase iti malem. Ti la paglemlemmenganda a likud ti pasdek. Manmanonton, ta saan nga isu ti last period-da, ti madanonna iti kuartoda no sarungkaranna ti siledda. Naparpardas pay ngem iti bullet train ti panaglemmeng dagiti adalanna.

Ngem di latta a nagung-unget ni Maestro Rilo. Nasayaat latta ti impakpakitana kadagiti adalanna. Gapu ta adda dua nga oras a bakantena iti agmalem, inaramatna daytoy a nangaramid iti gardenna iti nakasamsamek nga amianan-a-laud a suli ti solar ti pagadalan. Dati a basuraan iti nasao a paset. Inanusanna a pinaksiat dagiti ruot. Narigatan pay a nangpatad a bukbukodna ta nagadu a plastik a nagusodna ket uray la kumalkag ti gabion ken pala nga usarna. Awan ti katulonganna nga ubbing ta awan ti TLE class-na. Bambannogna laeng no agpatulong ta ad-adu la a panagpatpatuleng ti ubraenda. Addanto dita ti mangpirpirit lattan iti barsanga a dina met pag-oten. Wenno sumanao a pangtakkabna iti dina panagtrabaho. Kasla kalaingan nga agbabaon.

Idi agkarayamen dagiti mula a karabasa ken kamotit ni Maestro Rilo, isu met a natikagda. Inan-anusanna a sinibugan dagitoy. Ngem anian a pannakakellaatna idi agdisnudo dagiti lallaki nga adalanna nga isudan ti agsibog kada tunggal malem. Kas ita, Disiembre daydi.

Permi a siddaawna idi. Ania ngata ti naknakan dagitoy? nasaludsodna iti panunotna.

“Nanaginip yata kayo,” naalana pay laeng nga inyangaw kadakuada.

“Hindi, sir,” kinunada. “Nakita namin ang kabaitan mo; ‘di ka nagsasawang kami’y mahatak sa tamang landas.”

“Akemko dayta kas maikadua a nagannak kadakayo,” insungbat ni Maestro Rilo idi mariknana ti kinaserioso dagiti ubbingna.

“Sikaw fagalan y maestro a nassingan mi nga ari map-pasiran a madafingan ta davvun y lima na,” kinuna pay ti maysa kadakuada.

Ni kano laeng Maestro Rilo ti nakitada a titser a dina ibain ti marugitan dagiti imana nga agtrabaho.

Gapu iti panangidaulona nga agdalus no kasta a sumro ti sadutis dagiti adalanna? Gapu iti bukbukodna a nangasikaso iti bukodna a garden?

Napayaman ti uneg ni Maestro Rilo ta nagbunga met laeng ti reversed psychology nga impakatna.

Give love, nakuna ni Maestro Rilo iti panunotna, not only during Christmas… but everyday. Di maitutop a maawan kenkuana dayta a kas mannursuro.

Wen, nagbalin a modelo, saan laeng nga iti sao. Nangruna la unay iti aramid. Napia ta awan pay ti bukodna a pamilia ta maipamaysana ti akemna. Awan ti pinanunotna no di ti panagnakem, pannakaited iti maitutop a sirib kadagiti adalanna.
Ngem no kastoy a mangngeganna ti Give Love on Christmas Day, saan a dina malagip daydi umuna a nagrukbabanna.

(Adda tuloyna)