Maysa kadagiti suspek a nangpapatay ken ni Barangay Captain Alcantara, nabigbigen

NARVACAN, Ilocos Sur – Awan pay makalawas kalpasan ti panangibilin ni Ilocos Sur Provincial Director Senior Supt. Nestor Felix iti panangtutok dagiti kapolisan kadagiti pammapatay iti lugar a responsibilidadda, nabigbigen ti maysa kadagiti maatap a nangpapatay iti barangay captain ti Nalvo, Sta. Maria, Ilocos Sur.

Iti progress report nga impatulod ti Narvacan police station iti Provincial Police Office, Bulag, Bantay, Ilocos Sur, innagananda ni Albino Floria y Pacubas, residente iti Sta. Lucia, Ilocos Sur, a maysa kadagiti suspek a nangpaltog ken ni Nalvo Barangay Captain Melchor Alcantara y Sembrano, 51, iti national highway a sakup ti Barangay San Antonio idi sardam ti Marso 28.

Mapapati a ni Floria ti nagmaneho iti motorsiklo nga inaramat dagiti suspek idi insayangkatda ti pannakapapatay ni Alcantara.

Maipalagip  nga idi agarup 8:40 ti sardam ti nadakamat a petsa, pinaltogan dagiti armado a lallaki a nagkalubbon iti motorsiklo ni Alcantara bayat ti panagdaliasat ti luganna nga Adventure iti national highway a sakup ti Barangay San Antonio, Narvacan, Ilocos Sur.

Segun iti inbestigasion, bayat ti panagtaray ti lugan ni Alcantara iti agpaabagatan a direksion, inabay ti motorsiklo a nagluganan dagiti suspek ket maysa kadakuada ti nangpaltog iti sumagmamano a daras iti biktima a nagsagrapan daytoy kadagiti sugat iti nadumaduma a paset ti bagina.

Naglibas a dagus dagiti suspek iti saan nga ammo a direksion.

Naitaray ti biktima iti Central Ilocos Sur District Hospital ngem naideklara daytoy a dead on arrival.

Nakarekobre dagiti inbestigador iti nakapasamakan ti krimen iti maysa a kapsula a mapapati a nagtaud iti calibre .45.

Iti pannakiuman kenkuana dagiti kameng ti lokal a media, kinuna ni Felix a dua nga ang-gulo ti kitkitaen dagiti inbes-tigador: ti saan a nalpas a konstruksion ti P8-million a balay ken iti mapapati a panang-facilitate ni Alcantara iti pannakapasardeng ti operasion ti maysa a drug personality iti Santa Maria.

“Namnamaenyo a nakatutok ti kapolisan iti pannakasolbar iti daytoy a kaso ti pannakapapatay ni Barangay Captain Melchor Alcantara,” kinuna ni Felix kabayatan ti pannakiuman kenkuana dagiti kameng ti media.

Iti kaudian a damag, naipaiman ti kaso a murder maikontra ken ni Floria ken maysa a John Doe ket nai-docket daytoy iti babaen ti NPS No. 1-03-INV-14D-00186.#