sinursuran-banner-sqSinursuranNi Jobert M. Pacnis

Maysa a Nasabrak a Panangimutektek: Maysa a Kinapudno…

Sinursuran ni Jobert M.Pacnis

Umuna a paset)

MAKAW-ID manen ita nga idi panawen dagiti appotayo wenno nagannaktayo, matangtangad, madaydayaw ken mapagpiaran idi ti maysa a mannursuro.

Ngem diak kayat a sawen a saanen a kasta kadagitoy a panawen. Laeng, dakkelen ti naggidiatanna.

Idi, kas sangkakuna dagiti nagannaktayo, no makasabatda iti maestra wenno maestro, agsasarutsot a panagdayaw ti ipaayda. Adda dayta respeto a saan a magatadan. Agiinnuna dagiti ubbing a sumabat iti titserda tapno bagkatenda dagiti gargaret daytoy nga itulnog iti kuartona.

Ket no manarimaanen ti klase ta adda agsubeg wenno mailaw-an a tumagari, iti maysa laeng a panangmira ti maestrana, agkutitimen daytoy ket saannan a maiperreng dagiti matana.

Nakababain idi ti mapaayaban dagiti nagannakna iti opisina ti prinsipal. Iti iruruar ti nagannak iti opisina, kasla adda dakkel a narabngis wenno naikkat iti kinataona.

Mabalin pay idi ti nakana a panangdisiplina kadagiti ubbing— kas koma iti panagbaut, panaglapigos, panangiguyod kadagiti buok iti pispis, panangiparintumeng iti kuarto (a dagiti dadduma, adda pay darat wenno balatongna), panagibilag kdpy.

Saan met idi a karkardayo ti panagbansag iti eraser ken tsok (nupay mapaspasamak pay laeng daytoy sagpaminsan).

Ti pagsayaatanna kadagidi a panawen, awan ti agreklamo kadagiti nagannak dagiti madusa nga ubbing.

No dayta ti pakaisuruanna, mestra, mestro, sige la’ng,” kunaenda pay ketdi no kasta a mapaayabanda. “Para met laeng iti pagsayaatan ti anakmi.”

Marikna la unay ti kinatalek dagiti nagannak kadagiti mannursuro kadagiti annakda. Sipupusoda pay a tumulong kadagiti ania man nga aramid iti eskuela tapno agdur-as daytoy. Ti komunidad, nagdakkelan a respeto ti ipapaayna kadagiti mannursuro.

Ken nupay madusa idi ti kasta unay ti ubing, saan a mangngegan ti panagreklamo, yiingar wenno panagsaona iti bastos iti maestrana. Sipupuso a mangawat iti kaibatogan ti nagkamtudanna.

Iti sistema, addada dagiti am-amotayo a mannursuro a nagbalin, nakatun-oy iti arapaapda, gapu kadagiti pannusa a nalak-amda idi agbasbasada pay laeng.

Pagarigan ni Ma’am Del (saanna a pudno a nagan), permi kan’ ti panangbaut kenkuana ti maestrana idi iti elementaria ta dina nasungbatan ti saludsod daytoy maipanggep iti fraction.

Fraction laeng, dimo pay ammo!” inyiriag kano ti maestrana. “Nagdambelkan, ‘ya!” Sa simmaruno dagiti nakakilkilnet a labak manipud iti nakayasan a kawayan.

Kuna ni Ma’am Del, daydi a sinao ti maestrana ti nagbalin a karit kenkuana. Nagmedior iti Math (a saanna a paborito a suheto) idi nangala ti Edukasion. Ita, addan a mangisursuro iti Senior High School a dayta nga asignatura ti iggemna.

ITA, kas kuna met laeng dagiti makapatpatangtayo a mannursuro, ken kapadasan, dakkelen ti nagbaliwan dagiti ubbing. Tinawen a kasla kumarkaro ti ugalida. Exact opposite-da idi panawen da apong.

Natuleng itan dagiti ubbing. Ipadpad-engda dagiti maibaga kadakuada.

Pagarigan laengen iti simple laeng a panagdalus iti kuarto ken paraangan ti pagadalan; panagiballeng iti basura ken ipapan kadagiti pakaibaonan. Adda dagitay agpalpaladaw tapno saanda a makatulong nga agdalus.

Mapukpukaw payen ‘tay makuna a sense of responsibility. No saan a maipalagip ti trabaho wenno obligasionda, uray nai-assign kadakuadan, saandan nga akmen. Trabaho pay laeng ni titser ti mangibaga, mangipalagip iti inaldaw. Yanna nga adat, bay-andanto pay laeng dagiti naurnong a rugit– awan mayat a mangakup. Panawanda agingga a makita manen ti maestra ket makapungtotton a mangbaon manen kadakuada.

Ti pay pagdaksanna kadagitoy a panawen, naingaren dagiti estudiante. Ammodan ti sumangdo kadagiti titserda. Saandan nga idaddadaneng dagitoy.

Saan a makuna a nagkurang dagiti titser. Pangarigan laengen ti kapadasan ti am-ammotayo. Iti kaundaynan nga agisursuro, kadagitoy kano laeng a saanna a maiggaman dagiti ubbingna idinto nga am-ammo a disciplinarian ken sumurotda kadagiti pammagbagana. Arig inaldaw nga adda parikut kadagiti ubbingna. No di kinnarit ken dinnanog, a normal laengen, adda dita ti tsismis, sinnao, ken pinnadakes. No saan, addada matiliwan nga agsigarilio, ti la pagpakpaksayanna, agdadael kadagiti ramit ken agsao iti binabastos iti padana nga ubing/estudiante— uray payen iti titserna!

(Adda tuloyna)