Maysa a Paskua iti Biag ni Maestro Rilo

Sarita ni Jobert M. Pacnis
(Maudi a paset)

Tapno di agbalin a babantot dagiti “hilaw” a katuganganna (ta di inkasar ti lalaki), inkeddeng kano ni Relly ti agsubli iti sidong dagiti nagannak kenkuana.

Idi damo, natamnay ti panangawat dagiti nagannak ni Relly kenkuana. Nasakit kadakuada ti dina panangleppas iti panagadalna. Ngem idi agtallo tawenen ti ubing, in-inut a naawat da Manang Liza ken Manong Vincent ti napasamakna, aglalo ket nagbalinen a liwliwada ti ubing.

Pinanawan ni Relly ti anakna idi aguppat ti tawen daytoy tapno mangged idiay Manila. Maminsan iti makatawen sa agawid. Ngem idi agbasan ti ubing, napanunotna ti agabrod ta saanen nga umanay ti masapsapulanna iti dumakdakkel a kasapulan ti anakna.

Nasakit, kas kadagiti dadduma a mangpanaw kadagiti ipatpategna iti biag, ti rikna ni Relly a mangpanaw iti anakna idi addan nakem daytoy. Kayatna, kadennana daytoy tapno maisurona iti dalan a kas mayannurot iti pannursuro ti Namarsua. Ngem isu ti met ti kidkiddawen ti panawen. Ad-adda nga awan pagbanaganda nga agina no saan nga agbrod. Aglalo ket nanumo laeng nga aglaklako iti ikan iti plasa da Manong Vincent ken Manang Liza.

Ita, addan iti maikadua a tukad ti Edukasion ni Adelyn a balasang ni Relly.

“Agistoriaka met iti maipapan ti pamiliam, a,” kinuna met ni Relly idi malpas daytoy nga agestoria.

“Maminsanton,” kinunana laeng. “Saan met siguro a daytoy ti maudi a panagkitata.”

Minisuotan ni Relly ngem daytay misuot a di met makasuron.

“Wen, Relly,” impasiguradona. “Urayem ta istoriaekto amin ti maipapan kaniak.”

BISPERAS ti Paskua. Agsasallupang dagiti agkaroling a nalabsan ni Maestro Rilo kabayatan a pampanurnorenna ti aspaltado a kalsada. Aginnagawen ti sipnget ken lawag. Sibibiag dagiti Christmas lights a malabsanna. Agsasallupangen dagiti ubbing ken nataengan nga agkaroling.

Dimtengen ti panawen, nakuna ni Maestro Rilo iti nakemna. No saanna pay nga asikasuen ti riknana, baka naladawton ti amin.

Insardeng ni Maestro Rilo ti motorsiklona iti sirok ti lugo iti nagsulian ti ridor iti daya. Nalawag ti paraangan ti bungalo a pagtaengan a rantana. Maipatpatayab dagiti agkakasam-it a kanta ti Paskua.Mangmangngegna dagiti kalangiking ti lunglongan.

Nagtoktok. Ni Relly ti nangilukat iti ridaw. Madlaw a naklaat daytoy. Dina la ketdi namnamaen ti kaaddana. Nagminar ti kupikop pay laeng a kinapintas ni Relly iti suotna a maong a siortpant ken kiaw a blusa a a nangbegkes iti pammagina.

“Merry Christmas!” kinuna ni Maestro Rilo.

“Merry Christmas, too. Nayaw-awankan sa?” nabagas ti panangkita ni Relly kenkuana.

“Ditoy a talaga ti papanak.”

“Sumrekka.”

Naurnos ken nadalus ti salas nga iti panagkuna ni Maestro Rilo, aglawa iti tres por kuatro metros. Agpayso, CD player ti mangmangngegna itay a mangipatpatayab kadagiti ayug-Pamaskua. Madama ti awan kupasna nga Ang Pasko ay Sumapit.

Inyam-ammo ni Relly kadagiti nagannak kenkuana. Naparagsit pay laeng dagiti baket ken lakay. Naisemda a namasangbay kenkuana. Awan kano ni Adeyn ta napan iti simbaan. Kameng kano ngamin iti choir ket masapul a praktisado dagiti kantaenda itoy a panangpasangbay iti Aldaw ti Mesias.

“Nakapasiarka?” inamad ni Relly ken ni Maestro Rilo kalpasan a duduadan iti salas. Rimmuar metten dagiti baket ken lakay ta mapanda met makimisa. Narigat kano ti maawanan ti tugaw.

“Umayak ngarud agistoria,” inyisemna.

“Iti?’

“’Diay inkarik, a, idi nagkitata. Maipapan iti kabibiagko, iti pamiliak… dayta no interesadoka pay,” intukod ni Maestro Rilo.

“Siempre met, a,” nagsam-it nga isem ti insubad ni Relly kenkuana.

Inrugi ni Maestro Rilo ti nagestoria idi insardengna ti nagsurat ken ni Relly. No kasano a naapektaran ti panagadalna idi naammuanna a makiasawan daytoy. Ti panagpursigena tapno matun-oyanna met laeng ti arapaapna.

“Alla, naimbag man ta diak nadadael ti panagadalmo, batch,” insinga kenkuana ni Relly.

“Sika ketdi ti nagbalin nga inspirasionko, a,” impasaksakna.

“Naimbagka pay, batch, ta propesionalkan,” sabali ketdi ti insungbat ni Relly kenkuana. “Ngem datao, agpatingga lattan a patagtagabo kadagiti ganggannaet. Agpakpakarigat tapno laeng maisakad ti panagbiagmi a sangapamilia.”

“Wen, agpayso, propesionalakon. Ngem kawaw latta ti panagriknak iti biagko…”

“Agdandaniwkan sa met?”

“Saan, Relly. Ket ita, kayatko a punnuan dayta a kinakawaw.”

“Ania ti kayatmo a sawen?” Iti CD player, naipatayab ti A Perfect Christmas ni Jose Marie Chan.

Celebrating the yuletide season/ Always lights up our lives/ Simple pleasures are made special too/ When they’re shared with you…

“Sangkasaom idi nga ubingta pay. Nalabit, saanmo met ngatan nga ibaga a kasta ita?”

“R-Rilo?”

“Wen, Relly. Saanak a naaddaan pay iti bukod a pamilia. Aklonek, idi nagasawaka, narpuog ti biagko. Nagrikep ti barukongko iti nagan ni ayat. Baduy, nalabit, a kunaem. Ngem dayta ti agpayso.” Pinerrengna ni Relly.

Ngem napadumog laeng ti babai.

Intuloy ni Maestro Rilo: “Ita, kayatko a mangngeg kenka no ituloyko ti agsagaba wenno saan.”

Ngem nagtalinaed latta a naulimek ni Relly.

“Saantan nga ubing… wenno umub-ubing. Maikanatad laeng a sanguenta ti agdama.”

“Addan anakko…”

“Idi pay nga ammok dayta. Ngem kas makitam, adtoyak latta…”

I can’t think of a better Christms/ Than my wish coming true/ And my wish is that you’d let me spend/ My whole life with you…

“Rilo…”

“Napudno ti gagemko kenka, Relly. Ammom dayta… idi pay laeng.”

“Mabutengak, Rilo…”

“Iti ania?”

“Nasaktanakon…”

“Saan a mangpasakit ti ayat a naguray iti naunday a panawen, Relly…” Binirok ti dakulap ni Maestro Rilo ti dakulap ni Relly. “Ulitek, saantan nga ubing…” Inagkanna ti dakulap ti ay-ayatenna

Nagpabus-oy ni Relly. “Ipategnakam koma nga agina…”

Uray la rimmimat dagiti Christmas lights iti Christmas tree iti panagkita ni Maestro Rilo. Inawisna ni Relly a mapanda iti simbaan. Kasla makitkitanan ti kinalawag ti kulluong iti abay ti altar ti simbaan a madanonda.

My idea of a perfect Christmas/ Is to spend it with you…

(Gibusna)