Maysa ti natay, 3 nasugatan gapu iti pannakakimatda

CABUGAO, Ilocos Sur – Maysa a mannalon ti natay idinto a nasugsugatan ti tallo pay a kakaduana gapu iti pannakakimatda sadiay Barangay Dardarat ditoy nga ili idi bigat ti Hulio 29.

Mismo a ni Barangay Captain Charles Garcia ti nangireport iti insidente police station babaen ti selpon.

Saanen a naidanon iti ospital ti biag ni Reynald Incillo y Constantino, 29, naasawaan, gapu iti nakaro a sinagrapna a sugat bunga iti pannakakimatna idinto a nagsagrap iti dunor iti nadumaduma a paset ti bagida da Reymond Incillo y Constantino, 22, baro; Rogie Sesuca Remolacio, 29, naasawaan; ken Angel Sambrana Padilla, 30, naasawaan, residenteda amin iti Barangay Dardarat, Cabugao, Ilocos Sur.

Iti panagimbestiga dagiti nagresponde a polis, napan nagraep dagiti uppat iti talon ti maysa a Constantino Garcia idi agarup ala una ti malem ti Hulio 27.

Idi nakaraepda, aggawiden dagiti biktima ket nagnada iti tambak idi kellaat a nakimatda.

Naitaray dagiti uppat iti Suero General Hospital ngem indeklara ti doktor a nangtaming ken ni Reynald Incillo a dead on arrival daytoy.#