Maysa ti natay, 8 nasugatan iti panagdinnungpar traysikel, dump truck

SUYO, Ilocos Sur – Maysa ti natay idinto a nasugatan ti pito a pasahero ti traysikel ken helper ti maysa a dump truck idi nagdinnungpar ti dua a lugan iti highway a sakup ti Barangay Baringcucurong ditoy nga ili idi malem ti Abril 23.

Naideklara a dead on arrival ni Elena Osias y Pido iti Tagudin General Hospital, Barangay Bio, Tagudin, Ilocos Sur, maysa kadagiti pasahero iti Honda TMX tricycle a minaneho ni Richard Lata y Estrada, 49, naasawaan, ken residente iti Barangay Lubnac, Tagudin.

Nasugatan dagiti dadduma pay a pasahero ti traysikel a pakairamanan da da Dannie Mae Labiano y Lata, 15, estudiante; Janet Tombok y Estrada 43, naasawaan; Bernalene Joy ArcidĀ  y Lata, 15, estudiante; Roseville Jeanne Evangelista, 13, estudiante; Marie Bhea Therese Ordiz y Lata, 15, estudiante; Marielle Althea y Lata, 11, estudiante, agpapada amin a residente iti Lubnac, Tagudin Ilocos Sur, ken ni Elena Osias y Pido, 50, naasawaan, natibo ti Ā Binalonan, Pangasinan kenĀ  residente iti Lubnac, Tagudin Ilocos Sur; ken maysa a Marshal Baguitan, helper a kadua ni Donnie Jem Damengmeng y Palki, 23, baro, residente iti Riverside, Ampusongan, Bakun, Benguet, ken drayber ti Mitsubishi mini-dump truck.

Naammuan iti inisial a panagimbestiga dagiti polis nga idi agarup 5:00 ti malem ti nadakamat a petsa, agpalaud a direksion ti traysikel ket iti kalsada a paset ti Suyo-Cervantes, napukaw ti drayber ti kontrolna iti manibela a nakaigapuan ti ikakautna iti bangir a linia ken panangdungparna iti dump truck a nakasugatan dagiti naglugan iti traysikel.#