Banner News: Maysan a sunset industry ti agrikultura iti Santa Catalina – Mayor Rapanut | Tawid News Magazine - Weekly Ilocos News 📰

Maysan a sunset industry ti agrikultura iti Santa Catalina – Mayor Rapanut

SANTA CATALINA, Ilocos Sur — Maysan a sunset industry ti agrikultura iti daytoy nga ili a mabigbig a “vegetable bowl” itoy a probinsia gapu ta ditoy a paggappuan dagiti nagduduma nga apit ti nateng ken lasona.

Dayta ti inrakurak ni Santa Catalina Mayor Edgar “Plong” Rapanut kadagiti kameng ti Ilocos Sur Integrated Press iti naangay a Kapihan iti Amianan Media Forum.

Impalgak ti Mayor a maibilangen kas agtabon nga init ti industria ti agrikultura iti ilida gapu iti agtultuloy a pannakarunot ti igid ti kabaybayan ti Santa Catalina nga in-inut a mangpunas kadagiti nalawa a kataltalonan a sigud a mamulmulaan kadagiti nagduduma a produkto nangruna iti nateng.

Mabigbig ti Santa Catalina kas nagkauna nga agmulmula iti Ilocos Sur kadagiti nagduduma a nateng kas ti repolio, cauliflower, pechay, lasona, kamas ken dadduma pay a produkto a sigud a maimulmula laeng sadiay Benguet ken Mt. Province.

Impakaammo ti Mayor a napartak ti panagteppang ti kabaybayan ket nalawan a talon ti inalun-on ti baybay, a maibilang a nadagsen a problema ti Local Government ti Santa Catalina nga ikagkagumaanda nga ibirokan iti sulosion tapno malapdan ti panagreggaay ti igid ti baybay a mapapati a gapu iti climate change ken dagiti napasamak a black sand mining iti naglabas a panawen sakbay ti panagtakemna.

Impakaammona a maysa a “long term solution” iti pannakalapped ti panagteppang iti igid ti baybay iti Santa Catalina ket ti pannakabangon ti coastal road manipud iti Vigan Airport agpa-Amianan iti Santa Catalina agingga sadiay Sinait.

Impalgakna a ti narugianen a coastal road ket proyekto ti Department of Public Works and Highway babaen ti pannakitinnulong da Gov. Ryan Singson ken First District Congressman Deogracias Victor Savellano tapno maaddaan iti nasayaat nga alternatibo a kalsada ken tapno agserbi a trensera ti panagteppang ti igid ti kabaybayan.

“No malpasto ti coastal road ket national highway dayta, obligasion ngarud ti DPWH a mantineren dayta a kalsada nga agserbi pay a proteksion ti panagteppang ti igid ti baybay,” inlawlawag ti Mayor ti pagsayaatan nga ipaay ti coastal road iti ilida.

Inlawlawagna a maysa ti proyekto a coastal road a mabangon ti nangikeddenganna a suportaranna ti kandidatura ni Cong. Savellano imbes a ni sigud a Cong. Ronald Singson ta patienna nga ad-adu dagiti maitulong ti agdama a kongresista kadagiti proyekto ti ilida a sapasap a pakabenepisiaran dagiti kailianda.

Impakaammona pay nga uray no maibilangen a sunset industry ti agrikultura, ket sunrise industry met ti industria ti turismo gapu ta kaabay ti ilida ti Vigan City a mabigbig a World Heritage Site ken maysa kadagiti New Seven Wonder Cities of the World.

Inlawlawagna a ti panagassideg ti Santa Catalina iti Vigan City a daydaywen dagiti nagadu a turista ket mairaman ti ilida iti agluppias a bilang dagiti turista a mapmapan iti siudad.

Impakaammona nga adu dagiti planoda a pagbalinen a tourist attraction iti ilida agraman ti Juan Salcedo Cross iti Brgy. Cabittaogan a mabalin a pilgrimage site, ngem iyun-unada pay a padur-asen dagiti imprastraktura ken pasilidad nangruna dagiti kalsada sakbay nga ipamaysada a padur-asen dagiti lugar nga agbalinto a tourist destination iti ilida.

Nagapila pay ni Mayor Rapanut kadagiti kailianda nangruna kadagiti pasurotda iti kabalubalna a ni sigud a Mayor Carlos Asuncion a pagtalinaedenda koma a naurnos ken nakappia ti eleksion iti ilida ken saan koma a maulit dagiti napasamak a dakes iti naglabas a panagpipili tapno saan a mamantiaan ti nasayaat a reputasion ti ilida.

“Maysa laeng nga aldaw ti eleksion ket diak kayat a dadaelenna ti nasayaat a panaglalangen dagiti umili,” kinuna ni Mayor Rapanut iti panangilawlawagna a nasayaat met latta ti panaglangenda iti kabalubalna no agsasarakda kadagiti pasken.

Impakaammona pay a nakapagpatangdan ken ni Ilocos Sur Police Provincial Director Colonel Adolfo Rafanan nga umili met laeng iti Santa Catalina nga ikagumaan ti PNP ti agbalin a neutral ken akemenda a nasayaat dagiti annongenda a mangtagiben iti nakappia ken natalna nga eleksion iti ilida. Impalgakna a dakkel ti talekna iti Police Provincial Director ta kas umili iti Santa Catalina ket ammona ti pakasaritaan dagiti naglabas nga eleksion iti ilida.

Kiniddaw pay ni Mayor Rapanut kadagiti adda iti Simbaan Katolika, iti Parish Pastoral Council for Responsible Voting ken kadagiti kameng ti media a tumulongda koma iti pannakapagtalinaed iti honest, orderly and peaceful elections iti ilida.