Meat processing facility, maipatpatakder

CABUGAO, Ilocos Sur – Maipatpatakder ti maysa a meat processing facility sadiay Barangay Daclapan ditoy nga ili babaen ti panagkinnamayyet ti Department of Trade and Industry ken ti lokal a gobierno nga idadauluan ni Mayor Edgardo S. Cobangbang, Jr.

Segun ken ni Yolando Quiocho ti Department of Trade and Industry, mangipaay daytoy meat processing facility iti pamastrekan kadagiti residente iti Barangay Daclapan, nangruna dagiti babbai a kameng ti Rural Improvement Club.

Tarawidwidan ti RIC babaen ti superbision ti barangay council nga idauluan ni Barangay Captain Charlie Somejo daytoy pasilidad a pagaramidan iti kaliente a napunduan babaen ti Grassroots Participatory and Budgeting Planning manipud iti DTI ken ti LGU-Cabugao.

Kanaig daytoy, narugian itay Oktubre 24 ti panagsanay dagiti kameng ti RIC ti Barangay Daclapan mainaig iti panagusar iti makinaria, equipo, rimienta kasta met iti panagproseso iti karne kas paset ti panagsaganada iti umadani nga operasion ti nasao a pasilidad.#