Footer

MEDAL OF VALOR PARA KADAGITI MAINGEL

Komentario ni Eden A. Alviar

AWAN ti kaibatogan a gatad ti biag, ngem naindaklan a konsolasion dagiti naulila a pamilia dagiti napapatay a kameng ti Philippine National Police Special Action Force a natay sadiay Mamasapano, Maguindanao idi Enero 25, 2015, ti pannakaipaay ti Medal of Valor kadagiti natay a polis kabayatan ti pannakirangetda kadagiti miembro ti Moro Islamic Liberation Front, Bangsamoro Islamic Freedom Fighters ken private armed groups kabayatan ti counterterrorism operations.

Inaprobaranen ni Presidente Rodrigo Duterte ti pannakaipaay ti Medal of Valor (Posthumous Award), ti kangatuan a medalia a maited ti PNP, kadagiti 42 pay a natay a miembro ti PNP SAF kabayatan ti Operation Exodus a nakapapatayan ti international a terorista a ni Zulkipli Bin Hir alias Marwan. Immunan a napadayawan dagiti dua a miembro ti PNP SAF iti Medal of Valor. Naipaayan met dagiti dadduma ti Distinguished Conduct Star, ti maikadua a kangatuan a medalia.

Ti Medal of Valor ket maipaay kadagiti polis wenno soldado a nakaipaneknek ti naidumduma a kinatured ken panagsakripisio gapu iti awag ti panagserbi, ken nalawag a mangidumduma kenkuana kadagiti kakaduana a nangakem iti nakapegpeggad a serbisio. Maited laeng dayta a pammadayaw kadagiti nakirinnupak kadagiti kabusor a nabilbileg ken ad-adu nga amang ti puersa ken bilangda.

Immunan a naipaayan ti Medal of Valor da Senior Insp. Gednat Tabdi ken PO2 Romeo Cempron. Maipaayan metten dagiti 42 pay a miembro ti PNP SAF a da: Chief Insp. Ryan Pabalinas, Chief Insp. Max Jim Tria, Chief Insp. Garry Erana, Chief Insp. Cyrus Anniban, Sr. Insp. Joey Gamutan, Sr. Insp. Rennie Tayrus, SPO2 Lover Inocencio, SPO1 Rodrigo Acob Jr., SPO1 Virgel Villanueva, SPO1 Noel Golocan, SPO1 Andres Duque Jr., SPO1 Junrel Kibete, SPO1 Victoriano Acain Jr., SPO1 Roberto Allaga, SPO1 Jedz-in Asjali, SPO1 John Lloyd Sumbilla, PO3 Amman Esmula, PO3 Romeo Senin II, PO3 Chum Agabon, PO3 Glenn Bedua, PO3 Richelle Baluga, PO3 Noel Balaca Jr., PO3 Joel Dulnuan, PO3 Walner Danao, PO3 Godofredo Cabanlet, PO3 Franklin Danao, PO3 Jerry Kayob, PO3 Noble Kiangan, PO3 Ephraim Mejia, PO3 Omar Nacionales, PO3 Rodel Ramacula, PO3 Roger Cordero, PO3 Peterson Carap, PO3 Nicky Nacino Jr., PO2 Russel Bilog, PO2 Windel Candano, PO2 Loreto Capinding II, PO2 Gringo Cayang-o, PO2 Mark Lory Clemencio, PO2 Joseph Sagonoy, PO2 Oliebeth Viernes, and PO2 Angel Kodiamat.

Ti pannakaipaay ti Medal of Valor kadagiti napapatay a 42 a kameng ti PNP SAF ket maysa kadagiti kiniddaw dagiti pamiliada kabayatan ti pannakitaripnongda ken ni Duterte sadiay Malacañang sakbay ti maikadua nga anibersario ti trahedia. Mairaman pay kadagiti kiddaw dagiti naulila a pamilia ket naan-anay a tulong kadakuada, ken pannakaipaay ti hustisia kadagiti napapatay a polis.

Dakkel ti kaipapanan ti pannakaipaay ti Medal of Valor kadagiti pimmusay a kameng ti PNP SAF ta adu dagiti sagrapenda a benepisio kas ti tungpal a biag a pension ken libre nga edukasion para kadagiti annakda, ken adu pay a pribilehio ken benepisio nga intuyang ti linteg. Mainayon ti Medal of Valor kadagiti adun a tulong a naipaay kadagiti naulila a pamilia. Maibasar iti report ti PNP, dimmanonen iti P188 million ti gatad ti naipaay a tulong kadagiti naulila a pamilia, sabali pay dagiti housing and educational assistance a naipaay kadakuada.

Rebbengna a mabigbig ti naindaklan a sakripisio dagiti SAF 44, ngem nasken nga iti pannakabigbig dagita a sakripisio ket saan koma a maidumduma kadagiti pamilia dagiti dadduma pay a bannuar ken maingel a polis ken soldado a napno ti kinatan-ok ken tured a nangibuis wenno nangipusta ti biagda kadagiti napeggad a ranget iti nagan ti panagserbi iti pagilian. Saan aya nga iti iseserrek iti kinapolis ken kinamilitar ket kasinginnan ti kangatuan a panagsakripisio, ti panangibuis ti kakaisuna a biag no kasapulan.

Iti naglabas, adun a pasamak ti nakaibuisan ti biag dagiti natured ken maingel a soldado, kadagiti masaker a nangkellaat ti pagilian. Napasamak ti Patikul Massacre idi Oktobre 10, 1977 a nakatayan ni Brig. Gen. Teodolfo Bautista, Commander ti 1st Infantry Division ken dagiti 34 a kakaduana pakairaman dagiti uppat a koronel ti Philippine Army, ken ti Adjutant General ti AFP. Napapatayda iti ima dagiti kabusor a Moro National Liberation Front nga indauluan ti nangliput kadakuada a ni Commander Usman Salih. Naipaayan ni Bautista ti Distinguished Conduct Star ken Distinguished Service Star met dagiti koronel a kakaduana.

Napasamak pay ti Pata Island Massacre sadiay Pata, Sulu idi Pebrero 12, 1981 a nakapapatayan dagiti 119 a miembro ti Philippine Army 31st Infantry Battalion iti ima dagiti kabusor a rebelde a Muslim. Mairaman kadagiti namasaker ti Battalion Commander a ni Lt. Col. Jacinto Sardual, dagiti pasurotna nga opisial ken soldado. Ngem ania ti pammadayaw a nagun-odda? Ania ti tulong nga impaay ti gobierno kadagiti naulilada a pamilia? Naitanem lattan dagita a pasamak iti panaglabas ti panawen.

Adu pay nga operasion dagiti military ti nangipaneknekanda ti kinatured ken naindaklan a sakripisioda iti panangannongda kadagiti akemda kas adipen ti pagilian a nagsapata a madadaanda a mangisakripisio ti biagda para iti pagilian.

Iti pannakaited ti pammadayaw ket saan koma a kiddawen ti akin-pamilia dagiti pumusay wenno maited gapu ti impluensia wenno tarigagay dagiti saan a makaawat iti kaipapanan ti naindaklan a panagsakripisio. Saan koma a naited ti Medal of Valor kadagiti kameng ti PNP kabayatan a ti institusion ket sumangsango iti krisis iti integridad gapu kadagiti pannakainaig dagiti dadduma a polis kadagiti krimen kas ti “Tokhang for Ransom” ken pannakakidnap ken pannakapapatay ti negosiante a Koreano a ni Jee ick-Joo sadiay mismo uneg ti Camp Crame nga ayan ti PNP National Headquarters tapno saan a mamarisan a pangules ti medalia kadagiti kontrobersia ti PNP.

Ti pannakaipaay ti Medal of Valor kadagiti polis ken soldado ket agpaay koma nga inspirasion kadagiti dadduma tapno ibiagda ti sinapataanda nga agserbi iti pagilian, ken mangsaluad kadagiti umili nga awan ti supapak nga im-impenna.#