Medical-dental mission, naisayangkat iti Burgos

BURGOS, Ilocos Sur – Sabali pay a medical- dental mission ti naisayangkat iti daytoy nga ili kas paset ti programa ti gobierno probinsial a mangidanon iti serbisio ti salun-at kadagiti umili.

Kinuna ni Vice Gov.  Jeremias “Jerry” Singson a naisayangkat ti medical-dental mission iti daytoy nga ili itay Agosto 30 tapno matulongan dagiti agnaed iti upland municipalities nangruna iti problemada iti salun-at.

Iti interbiona iti radio, kinunana nga iti daytoy a gundaway, nagbalin a partner ti Ilocos Sur ti Madrigal Foundation babaen ti panangidaulo ti presidente ken CEO a ni Miss Lalaine Madrigal.

“Nangipaayda iti 50 boxes nga agas para iti nadumaduma a sakit kas koma iti antibiotics tapno matulongan dagiti agnanaed iti daytoy nga ili ken kaarrubana,”  kinuna ti bise gobernador.

Innayonna a malaksid iti panagbunot iti ngipen,  nangisayangkat pay dagiti dodoktor iti panagkugit, panagopera iti minor a bukol ken check-up ken libre dagiti naiwaras nga agas.

Nabukel ti nasao a mission babaen ti panagtitinnulong ti  Madrigal Foundation, Police Regional Office 1 nga idada-uluan ni Regional Director P/Chief  Supt. Leopoldo Bataoil, ken gobierno probinsial ti Ilocos Sur.

Ti RDO1 ti PNP  ti timmulong iti pannakaibiahe dagiti ag-agas manipud Manila.

Inlawlawag ni Singson a paset ti programa ti gobierno probinsial a panangtulong kadagiti marigrigat nga umili ti naisayangkat a  mission.

Immun-unan a naisayangkat ti medical mission iti  Cervantes, Salcedo ken Candon. #