Medical mission para senior citizens, naisayangkat

SAN JUAN, Ilocos Sur – Nasurok a dua ribu a senior citizens ti naipaayan iti serbisio a medikal ditoy nga ili idi Oktubre 24.

Kinuna ni Municipal Medical Officer Dr. Amelia Arcellana-Villalon a naipaayan iti libre a medical check-up ken libre nga agas ken anteohos dagiti senior citizens kas paset ti pannakaselebrar iti Elderly Week ditoy nga ili.

Naammuan ken ni Mayor Benjamin Sarmiento a naikkan pay dagiti senior citizens iti pinagpleteda iti yaayda panagpagtsek-ap ken iti panagsublida iti barangayda babaen ken ni Gov. Luis “Chavit” Singson.

Malaksid kadagiti empleado ti Rural Health Unit, nagserbi pay iti medical mission dagiti volunteer doctors ken nurses, iti pannakitinnulong dagiti empleado ti munisipio ken dagiti polis a timmulong iti naannayas a pannakaisayangkat iti medical mission.#