Mega Job Fair, naisayangkat

CANDON CITY – Impakaammo ni Congressman Elect Eric Singson nga adda  P20 milion a pondo a naited iti Ilocos Sur Cooperative Bank a pangtulong kadagiti kayatna ti agtrabaho iti ballasiw-taaw.

Agpaay ti pondo a kas guarantee fund tapno adda madadaan a mangtulong kadagiti aplikante nga awan busbosenna nga agbirok iti trabaho iti ballasiw-taaw, kinuna ni Singson bayat ti panangselebrar daytoy a siudad iti Maika-115 nga Anibersario ti Panagwaywayas ti Pilipinas itay Hunio 12.

Kas paset ti selebrasion, naisayangkat iti Candon City Civic Center iti daytoy nga aldaw iti Mega Jobs Fairs babaen ti initiatibo ni Singson ken iti pannakikammayet ti Department of Labor and Employment (DOLE) nga indauluan ni Regional Director Grace Ursua.

Nasurok dua a ribu nga awanan panggedan ti nagaplikar iti trabaho iti nasao a Jobs Fair  a nakipartisiparan dagiti nasurok 30 nga employers ken ahensia ti gobierno a pakaibilangan ti  Overseas Workers Welfare Administration (OWWA), Philippine Regulatory Commission (PRC), Technical Education Skills Development Authority (TESDA), Department of Social Welfare and Development (DSWD), PhilHealth, Civil Service Commission ken dadduma pay.

Kinuna ni Ursua a napateg ti nasao a job fair agsipud ta makatulong daytoy kadagiti awanan panggedan a makabirok iti pagsapulanda ditoy pagilian wenno iti ballasiw-taaw.

Segun ken ni Singson, saan laeng a dagiti agnaed iti maikadua a distrito iti Ilocos Sur ti nagbirok iti panggedan iti nasao a job fair no di pay dagiti awanan panggedan manipud iti La Union, Abra, ken umuna a distrito ti probinsia.

Ti tema ti job fair: Kalayaan 2013: Ambagan Tungo sa Malawakang Kaunlaran.#