Mekaniko, nabagsol

SAN ESTEBAN, Ilocos Sur – Gapu iti arak, naparnuay ti di panagkinnaawatan a nagtungpal iti pannakabagsol ti maysa a baro.

Nayospital iti Archie Tabuyo y Pena, 30, baro, mekaniko ken residente iti Barangay San Nicolas, ditoy nga ili, gapu iti panangbagsol kenkuana ni Ernest Salazar y Guzman, 33, naasawaan, tricycle driver,  ken residente iti Barangay Poblacion ditoy met laeng nga ili idi rabii ti Hunio 1.

Segun iti report, naggiinom ti suspek, ti biktima,  ni Ronald Darang ken Barangay Kagawad Florante Gomez iti balay ti biktima idi nagsubang ti suspek ken ni Darang.

Naganawa da Gomez ken ti biktima ngem imbato ti suspek ti iggemna a botelia iti balay ti biktima, a namkuatan ti Tabuyo a nangsurot ken ni Salazar sa mapapati a pinang-orna iti bote.

Innala ti suspek ti imuko iti uneg ti tool box ti traysikelna ket binagsolna ti biktima.

Tiniliw dagiti polis ti suspek ngem dida nasarakan ti imuko a pinangbagsolna iti biktima.#