Memo ni Chavit kadagiti mayor, barangay kapitan: all-out war kontra dengue

Immabuten 2,432 kaso, 14 natay iti dengue

VIGAN CITY- Maysa a memorandum ti impaulog ni Gov. Luis “Chavit” Singson a naiturong kadagiti municipal mayors ken barangay captains para iti pannakaiwayat ti “all-out war” maikontra iti sakit a dengue.

Kangrunaan a sinaguday ti memorandum ti pannakaideklara ti Agosto 27 nga “Operation Kontra-Dengue Day” no sadino a maiwayat ti sapasap a “search and destroy operations” kadagiti amin a lugar a paggianan, pagindegan ken pagitlogan dagiti lamok kadagiti barbarangay babaen ti panangidaulo dagiti town executives ken barangay captains tapno mapugipog ti sakit a dengue.

Naideklara a dengue outbreak ditoy probinsia gapu iti agtultuloy a yaadu dagiti kaso ken iti bilang dagiti natay iti sakit a dengue.

Iti kaudian a report, immabuten iti 2,432 dagiti kaso ti dengue iti probinsia manipud iti 2,293 idi napan a lawas. Nagbalin metten a 14 dagiti natay kalpasan a dua manen ti naireport a pimmusay gapu iti daytoy a sakit.

Sakbayna, maysa a dengue summit ti inangay ti gobierno probinsial a dinar-ayan dagiti agtuturay ti probinsia, municipal officials, municipal health units, barangay health workers ken dadduma pay a maseknan nga ahensia tapno tratarenda daytoy a problema ti salun-at.

Idi Agosto 1, indeklara ni Singson nga under state of calamity ti probinsia gapu iti sakit ti dengue tapno maaramat ti gobierno probinsial ti calamity fund a pangtulong kadagiti agindeg iti probinsia nga agsakit iti dengue.

Kinuna ni Gov. Luis “Chavit” Singson nga awanen ti gastuen dagiti dengue patients a maiserrek kadagiti district hospitals.

Binuangay pay ti gobierno probinsial ti provincial dengue task force ken pinaaktibona manen ti barangay dengue brigades ken iti pannakapapigsa dagiti blood bank units ti Philippine National Red Cross ken ti Gabriela Silang General Hospital idinto a nangisayangkat kadagiti information dissemination para iti ad-adda pay a pannakaammo maipapan iti dengue ken iti pannakaiwayat iti ad-adda pay a panagdalus iti arubayan ken panagipattog kadagiti amin a paggianan ti danum a pagit-logan ken pagindegan dagiti lamok ken iti pannakaisa-yangkat kadagiti fogging operations nangruna kadagiti lugar a paggapuan dagiti adu nga agsakit iti dengue.

Segun iti Provincial Health Office, ninayonanda dagiti narses a mangtaming kadagiti pasiente nga agsakit iti dengue, nangruna iti Gabriela Silang General Hospital no sadino nga uray payen iti pasilio ket nataarataren kadagiti pagiddaan dagiti pasiente.

Kabayatanna, insingasing ni Sangguniang Panlungsod Member Janina Medina ti pannakaikabil dagiti screen kadagiti amin a pagadalan iti siudad tapno maprotektaran dagiti agbasbasa kadagiti lamok nga agiwaras iti dengue.

Panggep pay ti gobierno ti siudad ditoy ti igagatangna iti automated hematoly analyzer  a pangduktal no positibo iti dengue ti maysa nga agsakit.

Iti kaudian a report, ti Vigan City ti kaadduanen iti kaso ti dengue, sumarsaruno ti Sto. Domingo, Cabugao, Bantay, ken Sta. Lucia.

Masipsiputan pay ti Candon City, Santa, Sta. Cruz, ken Caoayan gapu iti isusuyop dagiti bilang dagiti agsakit iti dengue kadagitoy a lugar.#